កាលពីពេលថ្មីៗនេះសារព័ត៌មានដ៏ល្បីរបស់អង់គ្លេសគឺ Dailymail បានធ្វើការចុះផ្សាយពីព័ត៌មានមួយដែលទាក់ទៅនឹងក្មេងស្រីអាយុ ១៣ ឆ្នាំម្នាក់ត្រូវបានប៉ូលីសចាប់ឃុំឃាំុំងព្រោះតែនាងបានលាក់គ្រឿងញៀនឲ្យក្រុមជួញដូរគ្រឿងញៀន។
ការសែតដដែលនេះបានរៀបរាប់ថា ក្មេងស្រីដែលត្រូវបានចាប់ខ្លួនមានឈ្មោះថា ឆាយ រស្មី (Chhay Reaksmey) មានអាយុ ១៣ ឆ្នាំ ហើយនាងធ្លាប់ត្រូវបានប៉ូលិសចាប់ខ្លួនម្ដងរួចមកហើយកាលពីអាយុ ១២ ឆ្នាំ ពីបទល្មើសដូចគ្នានេះ នឹងបានបញ្ចូនទៅមណ្ឌលកែប្រែអស់ ២ ទៅ ៣ខែ ប៉ុន្តែបន្ទាប់ចេញពីមណ្ឌលកែប្រែនាងក៏បានប្រកបមុខរបរលាក់គ្រឿងញៀននេះបន្តទៀតរហូតត្រូវបានប៉ូលិសចាប់ខ្លួនជាថ្មីនឹងដាក់ពន្ធនាគារ។
ចំណែកឯម្ដាយរបស់ក្មេងស្រីម្នាក់នេះ លោកស្រី សេង លីវ (Seng Live) បានប្រាប់អ្នកសារព័ត៌មានយ៉ាងដូច្នោះថា កូនស្រីរបស់គាត់មានអាយុទើបតែ ១៣ ឆ្នាំនោះទេ ប៉ុន្តែប៉ូលិសបានចាប់នាងក្រោមការប្រើប្រាស់ឈ្មោះបងស្រីរបស់នាងដែលមានអាយុ ២០ ឆ្នាំ។
មេធាវីរបស់នាង អ៊ុក វ៉ានដេត (Ouk Vandeth) បានហៅការចាប់នាងដាក់ពន្ធនាគារនេះគឺជារឿងខុសច្បាប់ លោកបានបន្តថា ហេតុអ្វីក៏ប៉ូលិសបានចាប់នាងហើយដាក់អាយុនាងថា ២០ ឆ្នាំ នាងមើលទៅក្មេងណាស់មិនសមអាយុ ២០ ឆ្នាំនោះទេ នាងនៅជាក្មេងលេងកៅស៊ូនៅឡើងទេ បើតាមអាយុពិតរបស់នាង គឺមិនទាន់ត្រូវបានច្បាប់កាត់ទោសឲ្យជាប់ពន្ធនាគារនោះទេ។
អានអត្ថបទបន្ថែមនៅលើគេហទំព័រដើម Dialymail
ទាក់ទងនឹងបញ្ហានេះក្រុមអ្នកច្បាប់បាននិយាយថា បើសិនជា ឆាយ រស្មី ពិតជាមានអាយុ ១៣ ឆ្នាំពិតប្រាកដមែន តាមច្បាប់របស់ព្រះជាណាចក្រកម្ពុជា ការចាប់នាងដាក់ពន្ធនាគារគឺជារឿងខុសច្បាប់ ប៉ុន្តែគេមិនទាន់ប្រាកដនៅឡើយថា នាងពិតជាមានអាយុ ១៣ ឆ្នាំដូចជាអ្វីដែលម្ដាយក៏ដូចជាមេធាវីរបស់នាងបាននិយាយ ហើយរងការទម្លាក់កំហុស ឬ ក៏នាងមានអាយុលើសពីនេះ ប៉ុន្តែម្ដាយរបស់នាងបានកុហកនោះទេ។
គួរបញ្ជាក់ឲ្យដឹងផងដែរថា ក្រោយការចុះផ្សាយ មានអ្នកដែលចូលមើលជាច្រើនបានបញ្ចេញមតិនៅខាងក្រោមអត្ថបទនេះ បែបមិនពេញចិត្តនឹងការចាប់ខ្លួនក្មេងស្រីម្នាក់នេះ ដោយពួកគេយល់ថានាងពិតជាក្មេងណាស់ ប្រហែលជាមិនដឹងថា ការធ្វើបែបនេះប៉ះពាល់យ៉ាងណាខ្លះនោះទេ ៕
ប្រភពcambomag
