ឈើល្មើសច្បាប់ដែលសមត្ថកិច្ចចាប់បាននាពេលកន្លងមក។ រូបថត សហការី
ព្រៃវែងៈ ឈើប្រណីតចំនួន ៣០៩ ដុំដែលជារបស់ឧកញ៉ា ទ្រី ភាព ត្រូវបានមន្ត្រីជំនាញរឹបអូសបានបន្ទាប់ពីរថយន្តដឹកឈើនោះបានក្រឡាប់នៅក្នុងស្រុកកំចាយមារបណ្ដាលឲ្យខូចខាតជណ្ដើរផ្ទះពលរដ្ឋមួយខ្នង។ នេះបើតាមមន្រ្តីរដ្ឋបាលព្រៃឈើខេត្តព្រៃវែងកាលពីម្សិលមិញ។
លោក ឈាង ងនហុង អនុប្រធានរដ្ឋបាលព្រៃឈើខេត្តព្រៃវែងបានថ្លែងថាអាជ្ញាធរបានរឹបអូសឈើទាំងនោះដែលរួមមានទាំងឈើប្រណីតលំដាប់ថ្នាក់ទាបចំនួន ២៩ គុបកាលពីថ្ងៃសៅរ៍ហើយលោកបានបញ្ជាក់ថាឈើទាំងនោះជារបស់ក្រុមហ៊ុនលោកឧកញ៉ា ទ្រី ភាព។
លោកបន្ថែមថា៖ «ពួកគេមានការអនុញ្ញាតចំពោះការដឹកឈើទាំងនោះប៉ុន្តែនៅពេលយើងផ្ទៀងផ្ទាត់វាមិនត្រឹមត្រូវ។ ការអនុញ្ញាតនោះគឺអនុញ្ញាតឲ្យ [ក្រុមហ៊ុនទ្រីភាពគ្រុប] ដឹកឈើលំដាប់ថ្នាក់ទីពីរ និងទីបីមិនមែនឈើប្រណីតទេ»។
លោក ងនហុង បានថ្លែងថាឈើនេះគឺដឹកពីខេត្តពោធិ៍សាត់ទៅខេត្តស្វាយរៀងហើយប្រសិនបើ «ម្ចាស់» មិនបង់ពន្ធទេករណីនេះនឹងត្រូវបញ្ចូនទៅតុលាការ។
ការរឹបអូសឈើនេះគឺកើតមានឡើងតែជាងមួយឆ្នាំបន្តិចបន្តួចប៉ុណ្ណោះបន្ទាប់ពីលោកឧកញ៉ា ទ្រី ភាព បាននិយាយជាមួយកាសែតភ្នំពេញប៉ុស្តិ៍ថាលោកមានបំណងបញ្ចប់សកម្មភាពកាប់ឈើរបស់ក្រុមហ៊ុនលោក។
ដោយសុំមិនបញ្ចេញឈ្មោះមន្រ្តីម្នាក់នៃស្រុកវាលវែង ខេត្តពោធិ៍សាត់បានថ្លែងថាក្រុមហ៊ុនរបស់លោក ភាព មានកម្មសិទ្ធិលើចម្ការកៅស៊ូ និងមានរថយន្តមួយចំនួនត្រូវបានគេឃើញមានផ្ទុកឈើប៉ុន្តែចំនួនរថយន្តដែលផ្ទុកឈើនោះគឺតិចជាងកាលពីពីរឆ្នាំមុន។
ក្រុមហ៊ុនទ្រីភាពគ្រុបមិនអាចទាក់ទងសុំការអត្ថាធិប្បាយបានកាលពីម្សិលមិញ។
ចំណែកអធិការរងនគរបាលស្រុកកំចាយមារវិញលោក សា កាឡា បានថ្លែងថាមានមូលហេតុពីរដែលបានបណ្តាលឲ្យរថយន្តនេះក្រឡាប់ ទី ១ គឺរថយន្តនេះរអិលហើយក្រឡាប់ ទី ២ អ្នកបើកបរងោក។
លោក សា កាឡា បានថ្លែងថា៖ «រថយន្តនេះត្រូវតែសងសំណង ១០០០ ដុល្លារទៅម្ចាស់ផ្ទះចំពោះការធ្វើឲ្យខូចជណ្តើរផ្ទះ»៕ PS
