និពន្ធដោយ : ថ្មីៗ August-06-2016
រដ្ឋាភិបាលក្រុងហាណូយ បានទទូចឲ្យរដ្ឋាភិបាលក្រុងភ្នំពេញជួយយកចិត្តទុកដាក់ចំពោះការរស់នៅរបស់សហគមន៍ជនជាតិវៀតណាមដែលកំពុងស្នាក់នៅកម្ពុជា។ ក្រុងហាណូយ ក៏បានស្នើឲ្យអាជ្ញាធរកម្ពុជា ធានាពីភាពស្របច្បាប់សម្រាប់ពលរដ្ឋវៀតណាមនៅកម្ពុជាផងដែរ។
ឆ្លើយនឹងសំណួររបស់អ្នកកាសែតពាក់ព័ន្ធនឹងរបាយការណ៍ក្រសួងមហាផ្ទៃកម្ពុជាលើការបណ្តេញចេញពលរដ្ឋវៀតណាមពីកម្ពុជាក្នុងឆ្នាំ២០១៥ លោក Le Hai Binh អ្នកនាំពាក្យក្រសួងការបរទេសវៀតណាម បានអះអាងថា វៀតណាម នឹងពិនិត្យពីរបាយការណ៍នេះ។ លោក បញ្ជាក់ថា មន្ត្រីវៀតណាម បានធ្វើការជាមួយនឹងសមភាគីកម្ពុជាពាក់ព័ន្ធនឹងការរស់នៅរបស់ពលរដ្ឋវៀតណាមនៅកម្ពុជាយ៉ាងជិតស្និទ។
នាឱកាសនៃការធ្វើសន្និសីទសារព័ត៌មានជាប្រចាំនៅថ្ងៃទី០៤ ខែសីហា អ្នកនាំពាក្យរូបនោះ ក៏បានសង្កត់យ៉ាងដូច្នេះថា «យើង ទទូចឲ្យអាជ្ញាធរពាក់ព័ន្ធកម្ពុជាជួយយកចិត្តទុកដាក់ទៅលើសហគមន៍វៀតណាមដែលកំពុងរស់នៅកម្ពុជា ហើយ ធានាពីសិទ្ធិស្របច្បាប់ និងផលប្រយោជន៍ពួកគេ ក៏ដូចជាជំរុញពួកគេដើម្បីឲ្យមានទាំងស្ថិរភាពក្នុងការរស់នៅ និងការធ្វើអាជីវកម្មផងដែរ»។
សូមបញ្ជាក់ថា ក្នុងឆ្នាំ២០១៥កន្លងមក ជនបរទេសខុសច្បាប់ចំនួន ៤៤២៤នាក់ (ស្រី៥៥៣នាក់) មានចំនួន ៤៩សញ្ជាតិ ត្រូវបានសមត្ថកិច្ចអន្តោប្រវេសន៍កម្ពុជាឃាត់ខ្លួននិងបញ្ជូនទៅស្រុកកំណើតវិញ។ ក្នុងចំណោមជនអន្តោប្រវេសន៍ទាំងនោះ អន្តោប្រវេសន៍វៀតណាមចំនួនច្រើនជាងគេ រហូតដល់ ៣៩៧៨នាក់ (ស្រី១១៥នាក់) ដែលមានចំនួន៩០ភាគរយ។ នេះបើតាមរបាយការណ៍ឆ្នាំ២០១៥ ពីអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ។
កន្លងមក អគ្គនាយកនៃអគ្គនាយកដ្ឋានអន្តោប្រវេសន៍លោក សុខ ផល ធ្លាប់បានបង្ហាញរបាយការណ៍ជនអន្តោប្រវេសន៍ខុសច្បាប់នៅកម្ពុជា កាលពីខែកក្កដា ឆ្នាំ២០១៥ ថា ជនអន្តោប្រវេសន៍ខុសច្បាប់វៀតណាមបានកើនឡើងពី ៧ម៉ឺននាក់ក្នុងឆ្នាំ២០០២ មកដល់១៦ម៉ឺននាក់ក្នុងឆ្នាំ២០១៤។ វាជាចំនួនកើនឡើងដែលធ្វើឲ្យលោកអគ្គនាយកកត់សម្គាល់យ៉ាងខ្លាំង។ មេប៉ូលីសអន្តោប្រវេសន៍រូបនេះ អះអាងថា ចំនួន១៦ម៉ឺននាក់នៃជនអន្តោប្រវេសន៍ខុសច្បាប់វៀតណាមនេះ ក៏មិនទាន់ជាចំនួនសរុបចុងក្រោយនោះដែរ៕
----------------------
https://thmeythmey.com/?page=detail&ctype=article&id=42942&lg=kh
