ក្ដីសង្ឃឹមដណ្ដើមយកមេដាយកម្រិតពិភពលោកជូនជាតិមាតុភូមិ របស់កីឡាការិនីតេក្វាន់ដូជម្រើសជាតិកម្ពុជា ស៊ន សៀវម៉ី ក្នុងព្រឹត្តិការណ៍កីឡាអូឡាំពិកនៅទីក្រុង Rio ប្រទេសប្រេស៊ីល ស្ទើរសាបសូន្យហើយ បន្ទាប់ពីចាញ់ជើងខ្លាំងមកពីប្រទេសហុល្លង់ Reshie Oogink ដោយលទ្ធផល ៧-១។ ក្រោយចប់ការប្រកួត ស៊ន សៀវម៉ី បានសម្រក់ទឹកភ្នែកឥតឈប់ ធ្វើឲ្យគ្រូបង្វឹក និងថ្នាក់ដឹកនាំ ព្រមទាំងកីឡាករ-កីឡាការិនីកម្ពុជា រំជួលចិត្តយ៉ាងខ្លាំង។
លោក ហែម គិរី អគ្គលេខាធិការសហព័ន្ធខ្មែរកីឡាហែលទឹក និងជាប្រតិភូចូលរួមព្រឹត្តិការណ៍អូឡាំពិកខាងលើ បានប្រាប់ពីប្រទេសប្រេស៊ីលមុននេះបន្តិចថា កីឡាការិនី ស៊ន សៀវម៉ី បានយំឥតឈប់ បន្ទាប់ពីចាញ់កីឡាការិនីមកពីហុល្លង់។ “បាទ! ហ្នឹងហើយ គាត់នៅយំរហូត ហើយខ្មែរខ្មែរយើង និងថ្នាក់ដឹកនាំយើងបាននាំគ្នាចុះមកលើកទឹកចិត្តគាត់ ព្រោះគាត់នៅចាំមើលហុល្លង់វ៉ៃបន្តទៀត”។ លោក ហែម គិរី និយាយ។
យ៉ាងណាក្ដី លោក ហែម គិរី បានបញ្ជាក់ថា យើងនៅមិនទាន់អស់ឱកាសទេ ព្រោះនៅចាំអ៊ុតលទ្ធផលរបស់កីឡាការិនីហុល្លង់ទៀត។ ប្រសិនបើកីឡាការិនីហុល្លង់ឡើងវគ្គផ្ដាច់ព្រ័ត្រដណ្ដើមមេដាយមាស នោះ សៀវម៉ី អាចមានឱកាសដណ្ដើមមេដាយសំរិទ្ធ តែបើកីឡាការិនីហុល្លង់ចាញ់វគ្គណាមួយនោះ សៀវម៉ី ក៏អស់ឱកាសដែរ៕
អត្ថបទ៖ គង់ វិសាល
រូបថត៖ ផ្ដល់សិទ្ធិដោយលោក ហែម គិរី
