ក្រោមជំនោរខ្យល់បក់វ៉ូៗតាមដងព្រែកកំពត ក្នុងថ្ងៃទី១ នៃការប្រឡងសញ្ញាប័ត្រមធ្យមសិក្សាទុតិយភូមិគេសង្កេតឃើញមានវត្តមានគ្រួសារពីរដែលមានកូនមកប្រឡង កំពុងអង្គុយពិសារបាយថ្ងៃត្រង់ក្បែរស្ពានឥន្ទធនូក្នុងក្រុងកំពត។
អ្នកមីង ងយ ងួន និងស្វាមីត្រូវជាម្ដាយឪពុករបស់ប្អូនស្រី សំរិន រស្មី មកពីវិទ្យាល័យ បិតាថវិកាជាតិ ដែលប្រឡងនៅមណ្ឌលវឌ្ឍនៈវិជ្ជា បាននិយាយថា៖“ខ្ញុំមកតាំងពីព្រឹក… ពេលថ្ងៃត្រង់ទិញបាយឲ្យកូន ហើយចាំដល់ល្ងាចកូនចេញ រួចនាំទៅផ្ទះសំណាក់ ទើបត្រលប់ទៅផ្ទះវិញ។ តាមពិតកូនវាថាមិនបាច់មកទេ តែខ្ញុំគិតថា ថ្ងៃសំខាន់របស់កូន មកលើកទឹកចិត្តកូន។
អ្នកមីង ធឿន និងស្វាមីរបស់គាត់ ជាគ្រួសារមួយទៀតមានកូនប្រុសម្នាក់មកប្រឡងដែរនោះ កំពុងតែហូបអាហារថ្ងៃត្រង់ដែលគាត់បានក្រោកចម្អិនដោយខ្លួនឯង និងនាំគ្នាពីរនាក់ប្ដីប្រពន្ធជិះម៉ូតូចម្ងាយ ៥០ គីឡូម៉ែត្រពីស្រុកឈូក ដើម្បីយកអាហារថ្ងៃត្រង់មកឲ្យកូនឈ្មោះ មាណ វិទ្ធី ប្រឡងនៅមណ្ឌលឌីប៉ុកសាមគ្គី ខេត្តកំពត។ “កុំឲ្យកូនបាក់ទឹកចិត្ត ឃើញម៉ែឪគេ (អ្នកភូមិជាមួយ) មកមើលកូនគ្រប់គ្នា”៕
អត្ថបទ៖ គីម សាយSabaynews
បាក់ឌុប៖ វិន័យតឹង តែវិញ្ញាសាធូរ ព្រឹកមិញ
ក្រុមអ្នកចូលរួមប្រលងបាក់ឌុបបានបង្ហាញទឹកមុខរីករាយក្រោយពីបានចូលប្រលងបាក់ឌុបកាលពីព្រឹកមិញ ព្រោះពួកគេចាត់ទុកវិញ្ញាសាប្រលងថាចេញមកធូរ ហើយអាចធ្វើបានច្រើន ប៉ុន្ដែ ពួកគេក៏ទទួលស្គាល់ថា វិន័យតឹងរ៉ឹង សម្រាប់ការប្រលងបាក់ឌុប ២០១៦នេះ។
អត្ថបទ៖ គីម សាយSabaynews
យុវតី ជៀវ សុម៉ារី មកពីសាលាវិទ្យាល័យហ៊ុន សែន សៀមរាប បានប្រាប់ក្រុមការងារ Sabay ថា ការប្រលងព្រឹកមិញវិន័យតឹងរ៉ឹង ប៉ុន្ដែ វិញ្ញាសា ចេញមកគឺធូរច្រើន ដោយសិស្សភាគច្រើនអាចធ្វើបានចន្លោះពី ៨០-៩០ %។
ស្ដាប់យុវតី ជៀវ សុម៉ារី និយាយពីការប្រលងព្រឹកមិញ៖
ក្រុមសិស្សផ្សេងទៀត ដែលសុំមិនបញ្ចេញឈ្មោះ បានឲ្យដឹងដែរថា បេក្ខជនភាគច្រើនឃើញវិញ្ញាសាប្រលង គឺហាក់មានទឹកមាត់លេបតែម្ដង ព្រោះពួកគេព្យាយាមមើលមេរៀន និង ធ្វើលំហាត់លំបាកៗ តែពេលចេញវិញ្ញាសា គឺស្រួលមែនទែន។ ពួកគេសង្ឃឹមការប្រលងច្រើននៅព្រឹកមិញ។
វិញ្ញាសាប្រលងព្រឹកមិញ មានមុខវិជ្ជា គីមី ជីវវិទ្យា (វិទ្យាសាស្ត្រពិត) ភូមិវិទ្យា ប្រវត្តិវិទ្យា (វិទ្យាសាស្ត្រសង្គម)៕
