22 Jan, 2016 11:18
កាលពីឆ្នាំ២០១៤ ក្រុមហ៊ុន Google បានបង់ប្រាក់ទៅឲ្យក្រុមហ៊ុន Apple ចំនួន១ពាន់លានដុល្លារដើម្បីរក្សាទុកប្រព័ន្ធ Search របស់ខ្លួននៅលើផលិតផល iOS ជាបន្ត។ នេះបើតាមការប្រកាសឲ្យដឹងតាមរយៈពាក្យបណ្ដឹងរបស់ក្រុមហ៊ុន Oracle ដែលប្ដឹងប្រឆាំងនឹងក្រុមហ៊ុន Google។
យោងតាមមេធាវីតំណាងក្រុមហ៊ុន Oracle បានឲ្យដឹងថាក្រុមហ៊ុន Google និងក្រុមហ៊ុន Apple បានព្រមព្រៀងគ្នាថានឹងចែករំលែកចំណូលក្នុងភាគរយមួយ។ ចំណូលដែលគេចែករំលែកនោះទៀតសោតគឺ ចំណូលដែលក្រុមហ៊ុន Google រកបានពីការផ្សាយពាណិជ្ជកម្មលើកម្មវិធី Search នៅលើផលិតផល iOS។
មេធាវីតំណាងរូបនេះបានលើកឡើងទៀតថា ភាគរយនៃការចែករំលែកចំណូលគឺប្រមាណជា៣៤ភាគរយ ប៉ុន្តែគេមិនច្បាស់ថាចំនួននេះគឺជាភាគរយដែលក្រុមហ៊ុន Apple ទទួលបាន ឬជាចំនួនដែលក្រុមហ៊ុន Google រក្សាទុកនោះ៕
