ក្នុងនាមជាមន្ត្រីមុខងារសាធារណៈម្នាក់ ឯកឧត្តម រុន ពណ្ណារិទ្ធ សមាជិកក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋលេខាធិការ និងជាព្រឹទ្ធបុរសមហាវិទ្យាល័យនីតិសាស្ត្រនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ហៅកាត់ថា «សាលាច្បាប់-RULE» មានក្របខ័ណ្ឌរហូតដល់ទៅ២កន្លែង គឺក្របខ័ណ្ឌគ្រូបង្រៀនកម្រិតឧត្តមនៅក្រសួងអប់រំ យុវជន និងកីឡាផង និងក្របខ័ណ្ឌនាយទាហាននៃកងយោធពលខេមរភូមិន្ទនៅក្រសួងការពារជាតិផង ។
ព័ស្តុតាងជាក់ស្តែងបានបង្ហាញឲ្យឃើញថា ឯកឧត្តម រុន ពណ្ណារិទ្ធ ជាមន្ត្រីរាជការឋិតក្នុងក្របខ័ណ្ឌគ្រូបង្រៀនកម្រិតឧត្តមនៅក្រសួងអប់រំ យុវជន និងកីឡា ទើបទទួលបានការដំឡើងឋានន្តរស័ក្តិ និងថ្នាក់ពីគ្រូបង្រៀនកម្រិតឧត្តមដើមខ្សែថ្នាក់លេខ២ មកគ្រូបង្រៀនកម្រិតឧត្តមដើមខ្សែថ្នាក់លេខ១ ដោយអនុក្រឹត្យរបស់រាជរដ្ឋាភិបាលលេខ៣៤៣អនក្រ.តត ចុះថ្ងៃទី២២ ខែមីនា ឆ្នាំ២០១៧ ។
លើសពីនេះ ព័ស្តុតាងបានបង្ហាញទៀតថា ឯកឧត្តម រុន ពណ្ណារិទ្ធ ក៏ជានាយទាហាននៃកងយោធពលខេមរភូមិន្ទ អត្តលេខ១៩៨៤០០ម្នាក់ដែរ មានតួនាទីជានាយរងការិយាល័យហ្វឹកហ្វឺនកងពលតូចលេខ៧០នៃអគ្គបញ្ជាការដ្ឋានកងយោធពលខេមរភូមិន្ទក្រសួងការពារជាតិ និងទទួលបានការដំឡើងឋានន្តរស័ក្តិថ្នាក់វរសេនីយ៍ឯក (ស័ក្តិ៥) ដោយអនុក្រឹត្យរបស់រាជរដ្ឋាភិបាលលេខ៦៧៨អនក្រ.តត ចុះថ្ងៃទី២២ ខែមិថុនា ឆ្នាំ២០១៦ ។
លោក រុន ពណ្ណារិទ្ធ ទទួលបានការតែងតាំងជាសមាជិកក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន ដោយព្រះរាជក្រឹត្យលេខនស/រកត/០៧១៥/៧៩០ ចុះថ្ងៃទី២៩ ខែកក្កដា ឆ្នាំ២០១៥ ពោលគឺ មានឋានៈជា «ឯកឧត្តម» ។
ឈានចូលពាក់កណ្តាលឆ្នាំ២០១៧នេះ គឺបន្ទាប់ពីទទួលបានការដំឡើងឋានន្តរស័ក្តិ និងថ្នាក់ជាគ្រូបង្រៀនកម្រិតឧត្តមដើមខ្សែថ្នាក់លេខ១រួចមក ឯកឧត្តម រុន ពណ្ណារិទ្ធ ក៏ទទួលបានការតែងតាំងជាព្រឹទ្ធបុរសមហាវិទ្យាល័យនីតិសាស្ត្រនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចរបស់ក្រសួងអប់រំ យុវជន និងកីឡា ដោយអនុក្រឹត្យរបស់រាជរដ្ឋាភិបាលលេខ៦០៤អនក្រ.តត ចុះថ្ងៃទី០៨ ខែមិថុនា ឆ្នាំ២០១៧ ខណៈការតែងតាំងមុខតំណែងឯកឧត្តម រុន ពណ្ណារិទ្ធ ជាព្រឹទ្ធបុរសមហាវិទ្យាល័យនីតិសាស្ត្រនៃសាលាច្បាប់ (RULE) នេះ ក៏បានទទួលរងនូវប្រតិកម្មពីសំណាក់អតីតនិស្សិត និងនិស្សិតកំពុងសិក្សានៅសាលាច្បាប់មួយចំនួនផងដែរ ។
តើប្រិយមិត្តអ្នកអានយល់ឃើញយ៉ាងណាដែរនៅពេលដែលឯកឧត្តម រុន ពណ្ណារិទ្ធ ព្រឹទ្ធបុរសមហាវិទ្យាល័យនីតិសាស្ត្រនៃសាលាច្បាប់មួយទាំងមូល មានក្របខ័ណ្ឌរហូតដល់ទៅ២កន្លែង (ទាំងស៊ីវិល ទាំងទាហាន) បែបនេះ ? ៕
ក្នុងនាមជាមន្ត្រីមុខងារសាធារណៈម្នាក់ ឯកឧត្តម រុន ពណ្ណារិទ្ធ សមាជិកក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី មានឋានៈស្មើរដ្ឋលេខាធិការ និងជាព្រឹទ្ធបុរសមហាវិទ្យាល័យនីតិសាស្ត្រនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ហៅកាត់ថា «សាលាច្បាប់-RULE» មានក្របខ័ណ្ឌរហូតដល់ទៅ២កន្លែង គឺក្របខ័ណ្ឌគ្រូបង្រៀនកម្រិតឧត្តមនៅក្រសួងអប់រំ យុវជន និងកីឡាផង និងក្របខ័ណ្ឌនាយទាហាននៃកងយោធពលខេមរភូមិន្ទនៅក្រសួងការពារជាតិផង ។