loveu24h

កាលពីយប់ថ្ងៃទី ៣១ ខែ តុលា ឆ្នាំ ២០១៦កន្លងទៅ កីឡាករវ័យក្មេងរបស់ក្លិបបាល់ទាត់បឹងកេតអង្គរ ចាន់ វឌ្ឍនាកា បានធ្វើដំណើរទៅប្រទេសជប៉ុន ដើម្បីធ្វើការហ្វឹកហាត់ជាមួយក្លិបមួយនៅទីនោះ មានឈ្មោះថា Fujieda MYFC នេះបើតាមការឲ្យដឹងពីលោក បែ មករា តួនាទីជាអ្នកចាត់ការទូទៅក្លិបបឹងកេតអង្គរ ដែលបានរួមដំណើរជាមួយកីឡាករវ័យក្មេងរូបនេះ។

រឿងខ្លះៗដែលមិត្តអ្នកអានគួរស្វែងយល់ពីក្លិប Fujieda MYFC ៖

១. ប្រភពក្លិប
Fujieda MYFC គឺជាក្លិបបាល់ទាត់មួយដែលបង្កើតឡើងចាប់តាំងពីឆ្នាំ២០០៩ម្ល៉េះ ដោយប្រកបអាជីពក្នុងលីគលំដាប់ទី៣របស់ប្រទេសជប៉ុន ចាប់តាំងពីរដូវកាល២០១៤មក ទទួលបានចំណាត់ថ្នាក់លេខ១១ និងលេខ៨នៅឆ្នាំបន្ទាប់ ( ២០១៥ )

២.កីឡាករ
ក្លិបនេះគឺជាក្លិបមួយក្នុងចំណោម៤ក្លិប ដែលមិនមានកីឡាករបរទេសនោះឡើយ ពោលគឺសុទ្ធតែកីឡាករសញ្ជាតិជប៉ុន ខណៈក្រុម១២ផ្សេងទៀត នៃលីគជាមួយគ្នាមានកីឡាករបរទេស ដូចជា សញ្ជាតិប្រេស៊ីល សញ្ជាតិ សឺប៊ីជាដើម ។

៣. កីឡដ្ឋានក្លិប
មានឈ្មោះថា Fujieda Sports Complex Park មានទីតាំងស្ថិតនៅក្នុងទីក្រុង Fujieda ដែលអាចមានលទ្ធភាពផ្ទុកអ្នកទស្សនាបានដល់ទៅ ១៣,០០០នាក់ ។ Fujieda ប្រកួតក្នុងទឹកដីនៃរដូវកាល២០១៦នេះ ១៣លើក ឈ្នះ ៩លើក ស្មើ ១លើក និងចាញ់ ២លើក ។

៤. កីឡាករលេចធ្លោ
សព្វថ្ងៃ កីឡាករ Yuichiro Edamoto គឺជាតួអង្គសំខាន់សម្រាប់ក្រុម Fujieda ពីព្រោះបង្ហាញខ្លួនក្នុងរដូវកាល២០១៦កន្លងមក រកគ្រាប់បាល់បាន១០គ្រាប់ ស្ថិតក្នុងចំណាត់ថ្នាក់លេខ៣ នៃបញ្ជីកីឡាករទាត់ចូលទីច្រើនជាងគេ។

៥. គ្រូបង្វឹក
លោក Atsuto Oishi គឺជាក្បាលម៉ាស៊ីនដឹកនាំក្រុមមួយនេះ ចាប់តាំងពីរដូវកាល២០១៥មកម្ល៉េះ ក្នុងរដូវកាល២០១៦នេះ លោកដឹកនាំក្រុម២៧ប្រកួត ឈ្នះ ១២លើក ស្មើ៣លើក និងចាញ់ ១២លើក មាន៣៩ពិន្ទុ ។

៦. ប្រៀបធៀបរយៈចម្ងាយ

បើយើងធ្វើការស្ទៀបស្ទង់អំពីចម្ងាយផ្លូវពីទីក្រុងភ្នំពេញ ( ប្រទេសកម្ពុជា ) ទៅដល់ទីក្រុង Fujieda MYFC ( ប្រទេសជប៉ុន ) គឺប្រហែលជាជាង៤ពាន់គីឡូម៉ែត

សូមបញ្ជាក់ផងដែរថា កីឡាករ ចាន់ វឌ្ឍនាកា នឹងធ្វើការហ្វឹកហាត់នៅទីនោះរយៈពេល ១សប្តាហ៍ មុនពេលធ្វើដំណើរបន្តទៅចូលរួមការប្រមូលផ្តុំហ្វឹកហាត់ជាមួយក្រុមបាល់ទាត់ជម្រើសជាតិកម្ពុជា ដែលនឹងប្រកួតមិត្តភាពអន្តរជាតិជាមួយក្រុមជម្រើសជាតិសិង្ហបុរីនៅក្នុងក្រុង Bihan ប្រទេសសិង្ហបុរី ថ្ងៃទី ១៣ ខែ វិច្ឆិកា ឆ្នាំ ២០១៦ ខាងមុខនេះ។