លោក លិកជាអ្នកម៉ាស្សាជនពិការភ្នែកទាំង ៦ រូប។ រូប សហការីរិន ច័ន្ទរិទ្ធិ (ស្តាំ) និងបុគ្គលិក
Thu, 1 September 2016
ភ្នំពេញៈ ទើបនឹងបានបើកបម្រើសេវាកម្មម៉ាស្សាជនពិការភ្នែក បានជាងកន្លះខែ និងមិនទាន់ឃើញមានអតិថិជនបានស្គាល់ច្រើនក្តី តែជាទឹកចិត្តជួយសង្គមតាមរយៈការបង្កើតការងារឲ្យជនពិការភ្នែកអាចរកប្រាក់កម្រៃ ដើម្បីចិញ្ចឹមជីវិតដោយខ្លួនឯងបាន ដែលមិនរំពឹងជំនួយពីអ្នកដទៃនោះគឺជាទង្វើចិត្តល្អគួរកោតសរសើរ។
លោក រិន ច័ន្ទរិទ្ធិ ជាម្ចាស់ហាងសេវាកម្មម៉ាស្សាជនពិការភ្នែក បានបង្ហើបប្រាប់ត្រួសៗនូវការកកើតកន្លែងម៉ាស្សាជនពិការភ្នែកនេះថា៖ «ដោយសារតែកន្លងមក បានមើលឃើញជនពិការភ្នែកភាគច្រើនបានដើរសុំទាន ឬដើរច្រៀងសុំលុយ នៅតាមដងវិថី ឬទីប្រជុំជន ទីផ្សារនានា មានស្ថានភាពលំបាកខ្លាំង និងបានដឹងថាមានជនពិការភ្នែកខ្លះ បានរៀនចប់ពីសាលាម៉ាស្សាហើយតែគ្មានឱកាសរកទីកន្លែងធ្វើការងារ។ នាពេលជួបពួកគាត់ ក៏នឹកឃើញបង្កើតនូវសេវាកម្មនេះតែម្តង។ យើងទើបបានដំណើរការបើកបម្រើអតិថិជន បានប្រហែលជាកន្លះខែប៉ុណ្ណោះ។ យើងមានជនពិការជាអ្នកម៉ាស្សាសរុបចំនួន ៦ នាក់ ស្រី ៣ នាក់ និងប្រុស ៣ នាក់ ខណៈមាន ៤ នាក់គឺជាអ្នកមានជំនាញខាងផ្នែកម៉ាស្សា ដែលបានចេញពីសាលារបស់អង្គការជប៉ុនមួយបានបណ្តុះបណ្តាលពួកគេ។ កន្លែងយើងមានគ្រែសម្រាប់ម៉ាស្សាខ្លួនចំនួន ៥ ខណៈមានគ្រែសាឡុងសម្រាប់ម៉ាស្សាបាតជើងមានចំនួន ៤ គ្រែ»។
លោកបានបន្តថា៖ «សម្រាប់សេវាកម្មម៉ាស្សាខ្លួនជាធម្មតាយើងគិតតម្លៃ ៥ ដុល្លារក្នុងមួយម៉ោង ខណៈម៉ាស្សាលាបប្រេងវិញតម្លៃ ៧ ដុល្លារ»។
ជនពិការទាំង ៦ រូបពេលធ្វើការងារក្នុងបន្ទប់ម៉ាស្សា។ ហ្វេសប៊ុក
ក្រៅពីជួយសម្រួលផ្គត់ផ្គង់ថ្លៃអាហារបីពេល និងផ្តល់កន្លែងស្នាក់នៅដល់បុគ្កលិកម៉ាស្សាជនពិការភ្នែកទាំង ៦ រូបនោះ ម្ចាស់ហាងសេវាកម្មម៉ាស្សាជនពិការភ្នែក ដែលមានចិត្តធម៌ខាងលើ ក៏មានផ្តល់ជូននូវប្រាក់កម្រៃដែលបានពីចំនួនអតិថិជនចូលមកម៉ាស្សាផងដែរ ទៅដល់ជនពិការភ្នែកទាំងនេះ។
លោក រិន ច័ន្ទរិទ្ធិ បញ្ជាក់ថា៖ «ប្រាក់កម្រៃសម្រាប់ពួកគាត់មានពី ៣០ ភាគរយទៅ ៤០ ភាគរយឯណោះតាមចំនួនភ្ញៀវជាក់ស្តែង និងតម្លៃប្រភេទនៃសេវាកម្មម៉ាស្សា។ យើងបើកបម្រើភ្ញៀវចាប់ពីម៉ោង ៩ ព្រឹក ដល់ម៉ោង ១២ យប់ រៀងរាល់ថ្ងៃ»។ លោកបន្ដថា៖ «ដូច្នេះសុំមេត្តាបងប្អូនជួយពួកគាត់ផង។ ការមកម៉ាស្សានៅទីនេះ មានន័យថាបានចូលរួមជួយជនពិការភ្នែក ដោយឲ្យមានការងារគាត់ធ្វើ»។
ដោយមិនផ្តោតខ្លាំងលើការរកផលចំណេញពីរបរនេះ និងមានរបរពាណិជ្ជកម្មផ្ទាល់ខ្លួនខ្នាតតូចមួយសម្រាប់ជួយផ្គត់ផ្គង់លើផ្នែកសេវាកម្មជួយជនពិការភ្នែកនេះបន្តទៅមុខទៀត លោកក៏រីករាយផងដែរប្រសិនបើបណ្តាក្រុមហ៊ុន ឬអង្គការសប្បុរសធម៌នានាមានបំណងចង់ចួលរួមសហការជួយនោះ។
ទីតាំងនៅផ្ទះលេខ ៥១ Eo ផ្លូវ១៧២ សង្កាត់ជ័យជំនះ ខណ្ឌដូនពេញ រាជធានីភ្នំពេញ ឬក៏នៅចន្លោះវត្តឧណ្ណាលោម និងវត្តសារាវ័នតេជោ៕
ប្រភព.postkhmer
