យន្តហោះទម្លាក់គ្រាប់បែករយៈចម្ងាយឆ្ងាយ Tu-22M3 របស់រុស្ស៊ីចំនួន៦គ្រឿង អមដំណើរដោយយន្តហោះចម្បាំង Su-30SM និង Su-35S ជាច្រើនគ្រឿងទៀត បានបើកប្រតិបត្តិការទម្លាក់គ្រាប់បែកដូចទឹកភ្លៀង កម្ទេចទីបញ្ជាការធំ ឃ្លាំងអាវុធ និងរំសេវ រថក្រោះ និងសម្លាប់សមាជិក ISIS អស់ជាច្រើននាក់ផ្សេងទៀត នីទីក្រុង Deir ez-Zor នៃប្រទេសស៊ីរី ។

លិខិតចេញផ្សាយដោយក្រសួងការពារជាតិ “យន្តហោះទម្លាក់គ្រាប់បែកទាំងនោះ បានហោះចេញពីមូលដ្ឋានទ័ពអាកាសក្នុងប្រទេសស៊ីរី ក្នុងបេសកកម្មទម្លាក់គ្រាប់បែកមានជាតិផ្ទុះខ្លាំង ទៅលើភាគនិរតី ភាគខាងកើត និងភាគឦសាន នៃទីក្រុង Deir ez-Zor” ។

ការវាយប្រហារតាមផ្លូវអាកាសបែបនេះ កម្ទេចទីបញ្ជាការធំ២កន្លែង ឃ្លាំងអាវុធ និងរំសេវធំៗ៦កន្លែង រថក្រោះ២គ្រឿង យានយន្តបំពាក់អាវុធ៤គ្រឿង និងរថយន្តប្រភេទ SUVs បំពាក់កាំភ្លើងយន្ត៧គ្រឿង និងសម្លាប់កងកម្លាំងអស់ជាច្រើននាក់ទៀត តែចំនួនមិនត្រូវបានបញ្ជាក់ ។

គួរបញ្ជាក់ថាកាលពីដើមសប្ដាហ៍មុននោះ យន្តហោះទម្លាក់គ្រាប់បែករយៈចម្ងាយឆ្ងាយ Tu-22M3 ក៏ធ្លាប់ត្រូវបានប្រើ ក្នុងបេសកកម្មវាយប្រហារលើគោលដៅ ISIS ក្បែរទីក្រុង Palmyra និងតំបន់ Es Sukhne និង Arak ដែរ ៕

ប្រភព៖ news.kqube