បច្ចេកវិទ្យាផលិតរថក្រោះរបស់ប្រទេសប៉ូឡូញកាន់តែរីកចម្រើនខ្លាំងឡើងៗ រហូតអាចផលិតរថក្រោះចម្បាំង ដែលអាចបំបាំងកាយមួយ ឈ្មោះ PL-01 ដោយបំពាក់បច្ចេកវិទ្យាទំនើប មិនចាញ់រថក្រោះ M1 Abrams របស់អាមេរិកឡើយ។ PL-01 ជាគំរូរថក្រោះបំបាំងកាយរបស់ប្រទេសប៉ូឡូញ ដែលបានបង្ហាញជាផ្លូវការនៅចុងឆ្នាំ២០១៣។
PL-01 ត្រូវបានផលិតឡើងក្រោមកិច្ចសហការគ្នារវាងក្រសួងការពារជាតិប៉ូឡូញ និងក្រុមហ៊ុន BAE Systems របស់អង់គ្លេស។ រថក្រោះនេះមានទម្ងន់ ៣៥តោន ប្រវែង ៧ម៉ែត្រ ទទឹង ៣,៨ ម៉ែត្រ និងកម្ពស់ ២,៨ម៉ែត្រ ហើយអាចផ្ទុកទាហានបាន៣នាក់។
រថក្រោះ PL-01 បំពាក់ដោយបច្ចេកវិទ្យា Adaptiv ដែលអាចការពារពីការតាមដានរបស់រ៉ាដា។ ស្រទាប់ Peltier អាចធ្វើឱ្យរថក្រោះបំបាំងខ្លួនពីការតាមដានរបស់ប្រព័ន្ធ Infrared Sensor ដោយការសម្របទៅតាមមជ្ឈដ្ឋាននៅជុំវិញ (ដូចវីដេអូ)។ លើសពីនេះវាបំពាក់ដោយបច្ចេកវិទ្យាទំនើប សម្រាប់ឃ្លាំមើលបរិស្ថានជុំវិញ នាពេលថ្ងៃនិងយប់ (Day/Night) ដែលអាចបង្វិលបានកម្រិត ៣៥០ដឺក្រេ។
ផ្នែកខាងក្នុងនៃកាណុងកាំភ្លើងធំទំហំ ១២០ម.ម អាចផ្ទុកគ្រាប់ដោយស្វ័យប្រវត្តិ និងមានកាំភ្លើងយន្ត (Coaxial Machine Gun) ទំហំ ៧, ៦២ម.ម នៅខាងឆ្វេងកាណុងធំ សម្រាប់ទប់ទល់នឹងទាហាន ឬគ្រឿងយន្តតូចៗ។ ចំណែកប្រហោងនៅសងខាងកាំភ្លើងយន្តនៅផ្នែកខាងលើរបស់រថក្រោះ គឺសម្រាប់បំផ្ទុះគ្រាប់បែក។
កំណែប្រែពេញលេញនៃគំរូរថក្រោះបំបាំងកាយ PL-01 នឹងត្រូវចប់សព្វគ្រប់នៅឆ្នាំ ២០១៦ ហើយចាប់ផ្តើមផលិតលក្ខណៈទ្រង់ទ្រាយធំនៅឆ្នាំ ២០១៨៕
វីដេអូ៖
ប្រែសម្រួល៖ ប៉ែត ផាន់និត
ប្រភព៖ foxtrotalpha
