រូបភាពពី វិដឺអូ របស់គណនី Tommy Angkor II ផ្សាយតាមហ្វេសបុកកាលពីសប្តាហ៍មុននៅពីមុខអាងស្តុកទឹកកំពីងពួយនៅខេត្តបាត់ដំបង។ រូបភាព សហការី
ម្ចាស់គណនីហ្វេសបុក Tommy Angkor II ចោទគេលក់អាងកំពីងពួយធ្វើការសុំអភ័យទោស
ម្ចាស់គណនីហ្វេសបុក Tommy Angkor II ដែលបានផ្សាយវិដេអូមួយ បានចោទប្រកាន់ថា ក្រុមមន្រ្តីបានលក់អាងស្តុកទឹកកំពីងពួយនៅខេត្តបាត់ដំបងបង្កើតឲ្យមានការចាប់អារម្មណ៍ពីអជ្ញាធរ បានធ្វើការសុំអភ័យទោសចំពោះការលើកឡើងរបស់រូបគេ កាលពីថ្ងៃម្សិលមិញ។
ចំពោះរឿងលក់នេះ បុរសវ័យ៣២ ឆ្នាំ ដែលសុំលាក់ឈ្មោះពិតរូបនេះបានឲ្យដឹងតាមរយៈបទសម្ភាសន៍មួយនៅថ្ងៃម្សិលមិញថា៖ «ខ្ញុំមិនដឹងថា វាជាការពិតឬក៏អត់នោះទេ។ ខ្ញុំចង់ធ្វើវីដេអូនេះ ព្រោះប្រជាជននៅក្នុងតំបន់មានការភ័យខ្លាច [មិនហ៊ានតតាំងចំពោះរឿងនេះ]។ បើសិនជាពួកគាត់ហ៊ានចេញមុខ ពួកគាត់នឹងជួបបញ្ហានៅពេលខាងមុខ។ ខ្ញុំគ្រាន់តែ នាំពាក្យពីប្រជាជនដែលបានប្រាប់ខ្ញុំយ៉ាងដូច្នេះតែប៉ុណ្ណោះ»។
នៅពេលដែលត្រូវបានសួរថា តើមានភ័ស្តុតាងអ្វីដែលធ្វើឲ្យអ្នកភូមិយល់បែបនេះ Tommy បាននិយាយថា ក្រុមអ្នកភូមិបានប្រាប់គេថា៖ «ពួកគេបានឃើញជនជាតិចិន និងជនជាតិកូរ៉េ» ក៏ប៉ុន្តែពុំបានបកស្រាយបន្ថែមទៀតឡើយដោយគ្រាន់តែឲ្យដឹងថា មានមិត្តភក្តិមួយចំនួនបានប្រាប់គេដូច្នេះដែរ។ រូបគេបានបន្តថា៖ «ខ្ញុំពុំបានសួរនោះទេ។ ប្រជាជនមានការភ័យខ្លាចក្នុងការផ្តល់ពត៌មាន»។
Tommy ដែលរស់នៅទីក្រុងភ្នំពេញ បានទៅបំភ្លឺប្រាប់សមត្ថកិច្ចថា រូបគេពុំមានបំណងធ្វើការបរិហាកេរ្តិ៍អ្វីនោះឡើយ។ រូបគេបាននិយាយថា៖ «ខ្ញុំពុំមានបំណងនិយាយអ្វីអាក្រក់ពីរដ្ឋាភិបាលនោះទេ។ ខ្ញុំពុំបាននិយាយថានរណាបានលក់វានោះទេ ហើយក៏ពុំបានបំផ្លាញឈ្មោះរបស់នរណាម្នាក់ដែរ។ បើសិនជាខ្ញុំបាននិយាយអ្វីខុសពីរដ្ឋាភិបាល សូមអភ័យទោសឲ្យខ្ញុំផង»។
នៅក្នុងលិខិតមួយកាលពីថ្ងៃទី ២៣ ខែឧសភា មន្ទីរធនធានទឹក និងឧតុនិយមខេត្តបាត់ដំបងបានប្តឹងទៅអាជ្ញាធរខេត្តឲ្យតាមឃាត់ខ្លួនអ្នកលេងហ្វេសបុករូបនេះពីបទបរិហាកេរ្តិ៍រដ្ឋាភិបាល។
លិខិតនោះបានថ្លែងថា៖ «Tommy Angkor II បាននិយាយពន្លើស ឬបំភ្លៃការពិត ដែលធ្វើឲ្យសាធារណជនយល់ច្រឡំថា អាងស្តុកទឹកនោះត្រូវបានគេលក់។ ការចោទប្រកាន់របស់ Tommy Angkor II បានប៉ះពាល់យ៉ាងធ្ងន់ធ្ងរទៅលើកិត្តិយស និងសេចក្តីថ្លៃថ្នូររបស់រដ្ឋាភិបាល»។
ភ្នំពេញប៉ុស្តិ៍ពុំអាចទាក់ទងសុំការអធិប្បាយពីមន្ទីរធនធានទឹកខេត្តបាត់ដំបងបានឡើយកាលពីថ្ងៃម្សិលមិញ។
លោក ហេង សាយហុង មន្រ្តីស៊ើបអង្កេតរបស់អង្គការសិទ្ធិមនុស្សលីកាដូ កាលពីថ្ងៃម្សិលមិញបានធ្វើការបញ្ជាក់ថា Tommy បានទូរស័ព្ទមកសុំជំនួយកាលពីថ្ងៃពុធសប្តាហ៍នេះ។ លោកបានឲ្យដឹងទៀតថា ការប្រជុំតទល់មួយនឹងត្រូវបានធ្វើឡើងដើម្បីឲ្យអង្គការលីកាដូធ្វើអន្តរាគមន៍ជាផ្លូវការ។
លោកបាននិយាយថា៖ «យើងមិនដឹងថា តើ[អាជ្ញាធរ]នឹងមានវិធានការច្បាប់ ចំពោះរូបគេ ឬក៏អត់នោះទេ។ ពេលខ្លះ ពួកគេគ្រាន់តែ និយាយតែប៉ុណ្ណោះ»។
យើងពុំអាចទាកទង់ទៅសមត្ថកិច្ចប៉ូលីសខេត្តបាត់ដំបងដើម្បីសួរថា ពួកគេនឹងធ្វើការចាប់ខ្លួន Tommy តាមពាក្យបណ្តឹងរបស់មន្ទីរធនធានទឹកដែរឬអត់នោះទេ៕ TN
