ភ្នំពេញ៖ តារាចម្រៀងអ្នកនាង ពេជ្រ សោភា ដែលផ្អើលឈឺធ្ងន់ធ្វើឱ្យអ្នកគាំទ្របារម្ភខំនាំគ្នា Share រូបនាងឱ្យល្បីនោះ ពេលនេះកំពុងលេចមុខហាត់សមនៅ ស្តាតអូឡាំពិក ដើម្បីត្រៀមការសម្តែងនិងច្រៀងបទ “រាំញីកែងជើង”។ ការបង្ហាញមុខរបស់នាងពេលនេះបានធ្វើឱ្យអ្នកគាំទ្រ និង អ្នកងឿយឆ្ងល់កន្លងមកអស់បារម្ភផង សោកស្តាយផង និង ខកចិត្តចំពោះព័ត៌មានរបស់នាងដែលផ្អើលលើសពីការពិត។
តាមសេចក្តីរាយការណ៍របស់អ្នកយកព័ត៌មាន Khmer Best News ដែលចុះយកទិដ្ឋភាពមុនការប្រកួតបាល់ទាត់មិត្តភាពរវាង កម្ពុជា និង ទីម័រខាងកើត នាល្ងាចថ្ងៃទី២៩ ខែឧសភា ឆ្នាំ២០១៦នេះ បានឱ្យដឹងថា ផ្ទុយពីការចុះផ្សាយ និង ការរាយការណ៍របស់អ្នកលេងហ្វេសប៊ុកកន្លងមក ដែលផ្អើលថា នាងមានឈឺធ្ងន់ រហូតអាចបាត់បង់ជីវិត។ វត្តមានរបស់នាងដែលលេចមុខ កំពុងហាត់សមនៅលើឆាកតន្រ្តីក្នុងស្តាតអូឡាំពិក ជាមួយ តារាចម្រៀង លោក ជីឌេវិត ក៏បានបង្ហាញផ្ទុយពីការបកស្រាយ ដែលនាងបានឈឺធ្ងន់នោះដែរ។
តាមការបញ្ជាក់របស់ភ្នាក់ងារព័ត៌មាន បានរាយការថា សកម្មភាព និង ការហ្វឹកហាត់របស់នាង ជាមួយ លោក ជីឌេវិត ពេលនេះមានស្ថានភាពធម្មតា និង រឹងមាំ ដែលអាចលោតច្រៀងរាំដូចរាល់ដង ដែលមើលទៅផ្ទុយទៅនឹងការថានាងជាអ្នកជម្ងឺ ឬ មានជម្ងឺធ្ងន់ធ្ងរ។
សូមរំលឹកថា កាលពីប៉ុន្មានថ្ងៃមុននេះ អ្នកនាង ពេជ្រ សោភា ត្រូវបានឃើញថា បង្ហាញអាការៈមិនស្រួលដេកលើគ្រែ ដែលធ្វើអ្នកគាំទ្ររបស់នាងច្រើននាំគ្នាបារម្ភ និងជូនពរឱ្យនាងមានសុខភាពល្អប្រសើរឡើងវិញ។ ប៉ុន្តែសម្រាប់អ្នកលេងមួយចំនួនបានរាយការណ៍ថា នាងជាមនុស្សដែលពូកែសម្តែងនិងបោកមហាជនប៉ុណ្ណោះ ដើម្បីបង្កើនប្រជាប្រិយភាព និង ចង់បានទទួលការអាណិតអាសូរ។
ជាមួយគ្នានោះមានអ្នកលេងម្នាក់នៅក្រុងប៉ោយប៉ែតបានរាយការណ៍ មុនថ្ងៃអ្នកនាង ពេជ្រេះ សោភា ធ្លាយដំណឹងធ្លាក់ឈឺដេកលើគ្រែម្តងទៀតនោះ នាងត្រូវបានឃើញមានវត្តមានក្នុងក្លឹបកម្សាន្តដែលគេអញ្ជើញមកច្រៀងរាំ។
សូមបញ្ជាកថា ក្រោយពីរៀបការរួចបានប្រមាណ២សប្តាហ៍អ្នកនាង ពេជ្រ សោភា កាលពីថ្ងៃទី៥ ខែកុម្ភៈឆ្នាំ២០១៥ បានដួលសន្លប់បាត់ស្មារតី នៅខេត្តព្រះសីហនុ ខណៈនាងនិងក្រុមគ្រួសារ បានដើរលំហែរកាយ ហើយក៏ដួលសន្លប់ភ្លាប់ដោយសារតែអាកាសធាតុក្តៅ គាប់ជួបនាងមានសុខភាពខ្សោយ។
តារាចម្រៀងរូបនេះមានបញ្ហាជម្ងឺគ្រាប់ឈាមក្រហមរបស់នាងបានធ្លាក់ចុះខ្លាំង ស្របពេលដែលចង្វាក់បេះដូងខ្សោយ ទើបបណ្ដាលឲ្យអ្នកនាងដួលសន្លប់តែម្ដង៕
