បច្ចុប្បន្នប្រទេសជាច្រើនកំពុងតែសំងំពង្រឹងវិស័យយោធារបស់ខ្លួន ហើយសម្រាប់ដែនដីដែលមានកម្លាំងយោធា និងគ្រោះថ្នាក់ខ្លាំងជាងគេបានកើនឡើងលើសពីកម្លាំងទាហាន នាពេលអតីតកាលដូចជាសង្គ្រាមលើកលើកទីពីរជាដើម។
ប្រទេសមហាអំណាចយោធាខ្លះៗដែលគ្រប់គ្រងពិភពលោកយូរមកហើយបានធ្លាក់ចំណាត់ថ្នាក់។ ដោយឡែកប្រទេសមួយនៅអាស៊ីអាគ្នេយ៍ បានក្លាយជាមហាអំណាចដែលមានកម្លាំងយោធាច្រើនជាងគេទី១០ក្នុងពិភពលោក ទោះបីជាបច្ចេកវិទ្យាអាវុធមិនទំនើបដូចមហាអំណាចចាស់វស្សាផ្សេងទៀតក៏ដោយ។
ខាងក្រោមនេះជាប្រទេសទាំងដប់មានកម្លាំងទាហានច្រើនជាងគេ៖
១០-វៀតណាម ទាហានសកម្ម ៤៨២០០០នាក់
អាយុបុរសវៀតណាមចាប់ពី១៨ដល់២៥ឆ្នាំមានកើនឡើងយ៉ាងខ្លាំងក្នុងរយៈកាលមួយឆ្នាំកន្លះចុងក្រោយនេះ។ ទោះជាយ៉ាងនេះក្ដីទាហានវៀតណាមមានចំនួនតិចជាងទាហានមហាអំណាចពិភពលោកលេខមួយ៤ដងកន្លះ។
០៩-ទួរគី ទាហានសកម្ម ៥១០៦០០នាក់
ទួរគីជាប្រទេសធំបំផុតទីពីរដែលជាសមាជិករបស់អង្គការណាតូ ដែលមានទាហាន៥១០០០០នាក់ជាទាហានសុទ្ធ។ប្រទេសមួយនេះមានគ្រាប់បែកនុយក្លែអ៊ែរ B61 ៩០គ្រាប់ និងមានជើងទម្របាញ់គ្រប់គ្រាន់ហើយពេលនេះទួរគីចង់ឲ្យអង្គការណាតូទទួលស្គាល់ក្នុងការប្រើប្រាស់អាវុធនេះ។
០៨-អ៊ីរ៉ង់ ទាហានសកម្ម ៥៣៤០០០នាក់
តាមរបាយការណ៍មួយបានសន្និដ្ឋានថា អ៊ីរ៉ង់បានអភិវឌ្ឍន៍យន្តហោះពិឃាតគ្មានមនុស្សបើក ដែលនេះជាផ្នែកមួយនៃភាពខ្លាំងរបស់ប្រទេសមហាសេដ្ឋីប្រេងកាតនៅមជ្ឈិមបូព៌ាមួយនេះ ប៉ុន្តែមានតម្លៃថោកជាងមីស៊ីលមួយគ្រាប់ដល់ទៅ១៤ដង។ កងទ័ពអ៊ីរ៉ង់បានឡើងមកចំណាត់ថ្នាក់លេង៨មានទាហានសកម្ម៥៣៤០០០នាក់។
០៧-កូរ៉េខាងត្បូង ទាហានសកម្ម ៦៣០០០០នាក់
ការរីករាលដាល និងភាពមិនត្រូវគ្នារវាងទីក្រុងព្យុងយ៉ាង និងសេអ៊ូលបានធ្វើឲ្យកូរ៉េទាំងពីរបង្កើនកម្លាំងយោធាក្នុងកម្រិតខ្ពស់មួយ ទោះបីជាប្រទេសទាំងពីរមានប្រជាជនតិចក៏ដោយបើប្រៀបធៀបជាមួយមហាអំណាចដទៃ។
០៦-ប៉ាគីស្ថាន ទាហានសកម្ម ៦៣០៤០០នាក់
ប៉ាគីស្ថានធ្លាប់មានសង្គ្រាមជាមួយឥណ្ឌាកាលពីឆ្នាំ១៩៦០ ប៉ុន្តែពេលនេះប្រទេសមួយនេះអាចនិយាយបានថាជាខ្លាលាក់ក្រចកដោយសារមិនសូវសកម្មលើឆាកអន្តរជាតិ។ ប៉ុន្តែភាពស្ងប់ស្ងាត់របស់ប្រទេសមួយនេះអាចជាមូលហេតុអាចរក្សាសន្តិភាពពិភពលោកបានមួយផ្នែកដែរ។
០៥-រុស្សី ទាហានសកម្ម ៧៦៨៥០០នាក់
មិនចាំបាច់និយាយច្រើនសម្រាប់ប្រជាជាតិមួយនេះ ល្បី ខ្លាំង និងមានអាវុធនុយក្លេអ៊ែរច្រើនជាងបណ្ដាប្រទេសមហាអំណាចផ្សេងទៀត។
០៤-កូរ៉េខាងជើង ទាហានសកម្ម ១១៩០០០០នាក់
ពេលនេះកូរ៉េខាងជើងឡើងមកលេខបួនក្នុងពិភពលោកហើយ។ ក្នុងចំណោមប្រជាជន១០នាក់មាន៤នាក់ជាទាហាន។
០៣-ឥណ្ឌា ទាហានសកម្ម ១៣២៥០០០នាក់
ចំនួនយោធាសកម្មដល់ទៅជាងមួយលានបីសែននាក់ប្រទេសមួយនេះ ក៏អាចនិយាយបានថាជាខ្លាសំងំក្នុងរូងមួយដែលប្រទេសដទៃគួរញញើត។ អាវុធទំនើបមិនដែលបញ្ចេញឲ្យពិភពលោកបានស្គាល់អស់នៅឡើយទេរួមទាងជាស្ដេចបច្ចេកវិទ្យាទៀតផង។
០២-សហរដ្ឋអាមេរិក ទាហានសកម្ម ១៤៣១០០០នាក់
មិនគួរឲ្យជឿថាអាមេរិកធ្លាក់មកលេខ២ ប៉ុន្តែអាវុធវិញទំនើបដាច់គេ គ្រាន់តែមានចំនួនទាហានតិចជាងចិនប៉ុណ្ណោះ។
០១-ចិន ទាហានសកម្ម២២៨៥០០០នាក់
ពេលនេះចិនឡើងមកលេខមួយហើយ ដោយមានទាហានសកម្ម២២៨៥០០០នាក់។ ភាពរីកចម្រើននៃសេដ្ឋកិច្ច យោធា ធ្វើឲ្យមហាយក្សនៅអាស៊ីមួយនេះ ក្លាយជាស្ដេចត្រាញ់ពិភពលោក តែយ៉ាងណាបច្ចេកវិទ្យាអាវុធមិនទាន់អាចប្រៀបជាមួយអាមេរិក និងរុស្សីនៅឡើយ។
ចំណាំ៖ ចក្រភពអង់គ្លេសធ្លាក់មកលេខ ៣៨ ដោយសារតែនយោបាយកាត់រំសាយទាហានរបស់រដ្ឋាភិបាល ហើយប្រទេសដទៃទៀតដូចជា៖ ក្រិក មីយ៉ាន់ម៉ា និងស្រីលង្កា ក៏រីកចម្រើនខាងយោធានេះដែរ តែមានចំនួនទាហានតិចជាង។
