ដោយសារប្រកាន់នូវនិន្នាការគាំទ្រគណបក្សនយោបាយរៀងៗខ្លួនរហូតដល់ថ្នាក់ «ខ្មែរលែងស្គាល់ខ្មែរ» ទើបមានអ្នកលេង Facebook មួយចំនួនព្រោះតែដើម្បីបង្អាប់បង្អោន ឬវាយប្រហារទៅលើគណបក្សសង្គ្រោះជាតិដែលជាគណបក្សនយោបាយប្រឆាំងនៅកម្ពុជា ឬចង់វាយប្រហារផ្ទាល់ទៅលើបេក្ខនារីចៅសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យមកពីគណបក្សសង្គ្រោះជាតិម្នាក់ ក៏នាំគ្នាហ៊ានក្លែងព្រះរាជក្រឹត្យមួយឲ្យមានការភ័ន្តច្រឡំពេញទំហឹងថា លោកស្រី ឃុន ចន្ទី ជាបេក្ខនារីចៅសង្កាត់ផ្សារកណ្តាល មានកំណើតដើមជាជនជាតិវៀតណាម សញ្ជាតិវៀតណាមទើបទទួលបានសញ្ជាតិខ្មែរ តាមការធ្វើសញ្ជាតូបនីយកម្មរួចប្តូរឈ្មោះថ្មីជា «ឃុន ចន្ទី» ខណៈអំពើខិលខូចរបស់អ្នកលេង Facebook មួយក្រុមនេះមិនត្រឹមភូតភរដល់អ្នកលេង Facebook ដូចគ្នាប៉ុណ្ណោះទេ គឺឯកសារក្លែងក្លាយនេះអាចបោកបាន «ទាំងស្រស់ៗ» ទៅលើលោក ពេជ្រ ស្រស់ ជាប្រធានគណបក្សនយោបាយមួយឈ្មោះ «យុវជនកម្ពុជា» ទៀតផង ។
លោក ពេជ្រ ស្រស់ ប្រធានគណបក្សយុវជនកម្ពុជា និងជាអ្នកលេង Facebook ម្នាក់ផងដែរ បាន Post នៅក្នុង Timeline របស់លោកនាថ្ងៃទី០៦ ខែមិថុនា ឆ្នាំ២០១៧ មានចំណងជើង «បាត់ទឹកដី និងបាត់ប្រទេសដោយសារភាពល្ងីល្ងើរបស់អ្នកនយោបាយភ្លេចពីកំណើតក្រពើ…» ដោយលោកបានបញ្ចេញទស្សនៈភ្ជាប់ជាមួយនឹងព្រះរាជក្រឹត្យមួយលេខ នស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ និងរូបលោកស្រី ឃុន ចន្ទី បេក្ខនារីចៅសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មកពីគណបក្សសង្គ្រោះជាតិថា «…ខ្ញុំមិនអស់ចិត្តចំពោះមេដឹកនាំនយោបាយគណបក្សសង្គ្រោះជាតិដែលបានអនុញ្ញាតឲ្យជនជាតិដើមវៀតណាមមកធ្វើអ្នកកាន់ចង្កូតប្រទេសកម្ពុជាទៅវិញ ។ ទោះបីជនជាតិវៀតណាមម្នាក់នេះ ត្រូវបានបញ្ចូលជាជនជាតិខ្មែរពីព្រះមហាក្សត្រក៏ដោយ ប៉ុន្តែចិត្តគំនិតរបស់ជនជាតិវៀតណាមមិនដែលបោះបង់ក្នុងការលេបយកទឹកដីខ្មែរម្តងណាឡើយ ។ ចំពោះមេដឹកនាំនយោបាយ និងក្រុមអ្នកគាំទ្ររបស់គណបក្សសង្គ្រោះជាតិនិយាយមួយម៉ាត់ណាស្អប់ជនជាតិវៀតណាម ប៉ុន្តែនៅខណៈនេះ យកជនជាតិវៀតណាមមកធ្វើជាមេរបស់ខ្លួន និងធ្វើជាមេរបស់ពលរដ្ឋខ្មែរពេញមួយសង្កាត់ទៀត ។ សម័យលោក ហ៊ុន សែន បាត់កោះ បាត់ដីតាមជាយដែន ប៉ុន្តែដល់សម័យស៊ី និងខា គឺបាត់ប្រទេសកម្ពុជាទាំងមូលហើយមើលទៅ ។» ។
ទស្សនៈមតិរបស់លោក ពេជ្រ ស្រស់ តាម Facebook ត្រូវបានគេហទំព័រសារព័ត៌មានមួយឈ្មោះ «ដើមអម្ពិល» ច្បិចយកមកផ្សព្វផ្សាយបន្ត ហើយក៏ត្រូវបានលោក ពេជ្រ ស្រស់ ធ្វើការ Share បន្តទៀតក្នុង Timeline របស់លោកនាថ្ងៃទី០៧ ខែមិថុនា ឆ្នាំ២០១៧ ។
មជ្ឈដ្ឋានអ្នកតាមដានឃ្លាំមើលកិច្ចការសង្គមនៅកម្ពុជាបានលើកឡើងថា ទស្សនៈរបស់លោក ពេជ្រ ស្រស់ ប្រធានគណបក្សយុវជនកម្ពុជា ពាក់ព័ន្ធនឹងផ្នត់គំនិតរបស់វៀតណាមមកលើកម្ពុជា គឺមានភាពត្រឹមត្រូវច្រើន ប៉ុន្តែប្រការដែលគួរឲ្យសោកស្តាយបំផុតផង គួរអស់សំណើចផង និងសឹងមិនគួរឲ្យជឿនោះផង គឺ ក្នុងនាមជាប្រធានគណបក្សនយោបាយម្នាក់បែរជាយកព្រះរាជក្រឹត្យក្លែងក្លាយកែបន្លំដោយក្រុមអ្នកលេង Facebook ខិលខូចមួយចំនួនមកធ្វើជាតឹកតាងចោទប្រកាន់ទៅលើគណបក្សសង្គ្រោះជាតិថាយកជនជាតិដើមវៀតណាមមកឲ្យធ្វើជាចៅសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ដោយខ្វះការពិចារណាទៅវិញ ។
តាមការអង្កេតស្រាវជ្រាវយ៉ាងយកចិត្តទុកដាក់បំផុតបានបង្ហាញឲ្យឃើញថា ព្រះរាជក្រឹត្យលេខនស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ ដែលលោក ពេជ្រ ស្រស់ យកមកធ្វើជាតឹកតាងសម្អាងចោទប្រកាន់ទៅលើគណបក្សសង្គ្រោះជាតិថា យកជានជាតិដើមវៀតណាមឲ្យមកធ្វើជាចៅសង្កាត់ផ្សារកណ្តាលនោះ មានភាពមិនប្រក្រតីធ្ងន់ធ្ងររហូតដល់ទៅយ៉ាងតិចចំនួន៤ចំណុច ដូចតទៅ ៖
១-ព្រះរាជក្រឹត្យលេខនស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ មិនអាចមានឡើយ ពីព្រោះលេខនស/រកត/០៣១៧/៣៨៣ គឺសម្រាប់សម្គាល់ព្រះរាជក្រឹត្យដែលចេញនៅខែមីនា ឆ្នាំ២០១៧ ប៉ុន្តែហេតុអ្វីបានជាព្រះរាជក្រឹត្យចុះកាលបរិច្ឆេទខែមីនា ឆ្នាំ២០១៤ទៅវិញ ?
២-ព្រះរាជក្រឹត្យលេខនស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ មិនអាចមានឡើយ ពីព្រោះត្រង់ចំណុចសរសេរថា «ពរល.៧៩២៤ ២៣៥» គឺសម្រាប់សម្គាល់ព្រះរាជក្រឹត្យដែលចេញនៅឆ្នាំ២០១៤ និងខែមីនា ប៉ុន្តែហេតុអ្វីបានជានៅលើព្រះរាជក្រឹត្យបែរជាបានចុះថា ពរល.៧៩២៤ ២៣៥ ទៅវិញ ?
៣-ព្រះរាជក្រឹត្យលេខនស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ មិនអាចមានឡើយ ពីព្រោះនៅត្រង់លេខ និងកាលបរិច្ឆេទសំណៅដែលមានតម្លៃជាការចែកចាយរបស់អគ្គលេខាធិការដ្ឋានរាជរដ្ឋាភិបាល គឺដូចគ្នាបេះបិទទៅនឹងព្រះរាជក្រឹត្យពិតប្រាកដមួយផ្សេងទៀត លេខនស/រកត/០៤១៥/៣៧៩ ចុះថ្ងៃទី២៤ ខែមេសា ឆ្នាំ២០១៥ ដែលព្រះមហាក្សត្រត្រាស់បង្គាប់ផ្តល់សញ្ជាតិខ្មែរតាមសញ្ជាតូបនីយកម្មដល់លោក ឡេ ឌិញប៊ូ (LE DINH BUU) ជនជាតិវៀតណាម សញ្ជាតិវៀតណាម កើតថ្ងៃទី០៧ ខែកញ្ញា ឆ្នាំ១៩៥៨ នៅស្រុកតៃស៊ឺន ខេត្តបិញឌិញ សាធារណរដ្ឋសង្គមនិយមវៀតណាម ដោយប្តូរឈ្មោះជា កែវ តារា (KEO DARA) គ្រាន់តែមានការកែឆ្នាំ២០១៥មកជាឆ្នាំ២០១៤ប៉ុណ្ណោះ ។
៤-ព្រះរាជក្រឹត្យលេខនស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ មិនអាចមានឡើយ ពីព្រោះគិតត្រឹមថ្ងៃទី១៥ ខែមីនា ឆ្នាំ២០១៤ មានព្រះរាជក្រឹត្យចំនួន៧លេខប៉ុណ្ណោះដែលបានចេញ និងបានបោះពុម្ពផ្សាយនៅក្នុងសៀវភៅរាជកិច្ចត្រឹមត្រូវឲ្យមានតម្លៃគតិយុត្តថែមទៀត (សៀវភៅរាជកិច្ចឆ្នាំទី១៤ លេខ២៦ សប្តាហ៍ទី១ ថ្ងៃទី០៨ ខែមេសា ឆ្នាំ២០១៤) គឺព្រះរាជក្រឹត្យលេខនស/រកត/០៣១៤/៣០៤ , ព្រះរាជក្រឹត្យលេខនស/រកត/០៣១៤/៣០៥ , ព្រះរាជក្រឹត្យលេខនស/រកត/០៣១៤/៣០៦ , ព្រះរាជក្រឹត្យលេខនស/រកត/០៣១៤/៣០៧ , ព្រះរាជក្រឹត្យលេខនស/រកត/០៣១៤/៣០៨ , ព្រះរាជក្រឹត្យលេខនស/រកត/០៣១៤/៣០៩ និងព្រះរាជក្រឹត្យលេខនស/រកត/០៣១៤/៣១០ (ដោយឡែក ព្រះរាជក្រឹត្យលេខនស/រកត/០៣១៤/៣០៣ គឺចុះថ្ងៃទី១១ ខែមីនា ឆ្នាំ២០១៤ និងព្រះរាជក្រឹត្យលេខនស/រកត/០៣១៤/៣១១ គឺចុះថ្ងៃទី១៧ ខែមីនា ឆ្នាំ២០១៤) ។
អនុលោមតាមព័ស្តុតាងជាក់ស្តែងទាំងនេះ គឺបានបង្ហាញឲ្យឃើញថា ព្រះរាជក្រឹត្យលេខនស/រកត/០៣១៧/៣៨៣ ចុះថ្ងៃទី១៥ ខែមីនា ឆ្នាំ២០១៤ គឺជាព្រះរាជក្រឹត្យក្លែងក្លាយកែបន្លំសុទ្ធសាធ ដែលជនខិលខូចលួចក្លែងកែបន្លំពីព្រះរាជក្រឹត្យពិតប្រាកដលេខនស/រកត/០៤១៥/៣៧៩ ចុះថ្ងៃទី២៤ ខែមេសា ឆ្នាំ២០១៥ ដើម្បីយកមកធ្វើជាឯកសារឡប់ឡែ វាយប្រហារទៅលើគណបក្សសង្គ្រោះជាតិ និងលោកស្រី ឃុន ចន្ទី ជាបេក្ខនារីចៅសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យមកពីគណបក្សសង្គ្រោះជាតិ ហើយក៏បានធ្វើឲ្យលោក ពេជ្រ ស្រស់ ដែលជាប្រធានគណបក្សយុវជនកម្ពុជា «ចាញ់បោក» យ៉ាងស្រស់ៗចំពោះព្រះរាជក្រឹត្យក្លែងក្លាយនេះ ព្រមទាំងក៏បានបង្ហាញឲ្យឃើញថា អាចជាលទ្ធផលធ្វើជាតិរងគ្រោះព្រោះតែ «ខ្មែរមិនស្គាល់ខ្មែរច្បាស់» ។
មជ្ឈដ្ឋានអ្នកច្បាប់ឯករាជ្យនៅកម្ពុជាបានលើកឡើងថា យោងតាមព័ស្តុតាងជាក់ស្តែងដូចបានបង្ហាញជូននេះ និងប្រសិនបើព្រះរាជាណាចក្រកម្ពុជាមានមន្ត្រីតុលាការឯករាជ្យ និងមានសមត្ថភាពវិជ្ជាជីវៈពិតប្រាកដ គឺលោកស្រី ឃុន ចន្ទី អាចប្រើប្រាស់សិទ្ធិដាក់ពាក្យបណ្តឹងទាមទាររកយុត្តិធម៌ ដោយឲ្យសមត្ថកិច្ចពាក់ព័ន្ធស្វែងរកជនខិលខូចដែលថ្លើមធំហ៊ានក្លែងបន្លំព្រះរាជក្រឹត្យយកមកធ្វើជាឧបករណ៍លេងសើចបង្អាប់បង្អោនដល់កិត្តិយសបុគ្គល និងគណបក្សនយោបាយដទៃ តាម Facebook នោះ បានគ្រប់ពេលវេលា ។
គួររំលឹកជូនថា លោកស្រី ឃុន ចន្ទី អាយុ៤៨ឆ្នាំ ធ្លាប់បានជាប់ឆ្នោតធ្វើជាចៅសង្កាត់រងទី២នៅសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យមកពីគណបក្ស សម រង្ស៊ី នាសម័យបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៣ ឆ្នាំ២០១២កន្លងទៅ និងសម័យបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤ ឆ្នាំ២០១៧នេះ បើយោងតាមលទ្ធផលឆ្នោតបឋមដែលប្រកាសដោយគណៈកម្មាធិការជាតិរៀបចំការបោះឆ្នោត គឺលោកស្រី ឃុន ចន្ទី នឹងជាប់ឆ្នោតជាចៅសង្កាត់ផ្សារកណ្តាលមកពីគណបក្សសង្គ្រោះជាតិ (ទទួលបានសំឡេងឆ្នោតគាំទ្រចំនួន៦ ១៨៧សំឡេង នាំមុខគណបក្សប្រជាជនកម្ពុជាដែលទទួលបានចំនួន៤ ៨៨៧សំឡេង)៕
http://www.dtn7.com/2017/06/10/19277.html/
