បណ្តាញខ្សែកាប Pacific Light Cable Network (PLCN) នេះនឹងត្រូវលាតសន្ធឹងចម្ងាយ ១២៨ ៨០០ គីឡូម៉ែត្រនៅបាតមហាសមុទ្រប៉ាស៊ីហ្វិករវាងទីក្រុងទាំងពីរដែលនេះគឺជាលើកដំបូងបំផុតសម្រាប់ខ្សែកាបប្រភេទនេះ។
ខ្សែកាបអ៊ីនធឺណិតល្បឿនលឿននឹងភ្ជាប់ទីក្រុងហុងកុង និងអាមេរិក
ក្រុងសានហ្វ្រានស៊ីស្កូៈ ក្រុមហ៊ុន Google និង Facebook នៅថ្ងៃពុធបានប្រកាសពីគម្រោងតភ្ជាប់ខ្សែកាបអ៊ីនធឺណិតពីទីក្រុងឡូសអេនជឺលេសទៅទីក្រុងហុងកុងក្រោមកិច្ចសហប្រតិបត្តិការជាមួយនឹងក្រុមហ៊ុនបុត្រសម្ព័ន្ធមួយរបស់សាជីវកម្ម China Soft Power Holdings។
បណ្តាញខ្សែកាប Pacific Light Cable Network (PLCN) នេះនឹងត្រូវលាតសន្ធឹងចម្ងាយ ១២៨ ៨០០ គីឡូម៉ែត្រនៅបាតមហាសមុទ្រប៉ាស៊ីហ្វិករវាងទីក្រុងទាំងពីរដែលនេះគឺជាលើកដំបូងបំផុតសម្រាប់ខ្សែកាបប្រភេទនេះ។
លោក Brian Quigley ប្រធានផ្នែកហេដ្ឋារចនាសម្ព័ន្តបណ្តាញរបស់ក្រុមហ៊ុន Google ឲ្យដឹងថាបណ្តាញខ្សែកាប PLCN នឹងអាចបញ្ជូនទិន្នន័យ ១២០ តេរ៉ាបៃ (១ តេរ៉ាបៃ=១ ពាន់ជីហ្គាបៃ) ក្នុង ១ វិនាទីដែលល្បឿងនេះអាចឲ្យធ្វើការសន្ទនាគ្នាតាមវីដេអូរវាងទីក្រុងឡូសអេនជឺលេស និងទីក្រុងហុងកុងដែលមានទំហំ HD ៨០ លានផ្តល់សំឡេងភ្លាមៗបានក្នុងពេលនិយាយ។
យោងទៅតាមសេចក្តីថ្លែងការណ៍រួមមួយក្រុមហ៊ុន Google និង Facebook កំពុងតែសហការជាមួយក្រុមហ៊ុន Pacific Light Data Communication Company (PLDC) និងក្រុមហ៊ុនបច្ចេកវិទ្យាគមនាគមន៍បាតសមុទ្រ TE SubCom លើការកសាងបណ្តាញខ្សែកាបនេះដែលនឹងបញ្ចប់នៅពាក់កណ្តាលឆ្នាំ ២០១៨។
លោក Wei Junkang ប្រធានក្រុមហ៊ុន PLDC បានមានប្រសាសន៍ថា៖ «ខ្សែកាប PLCN នឹងក្លាយជាផ្លូវខ្សែកាបអុបទិកល្បឿនលឿនមួយដែលតភ្ជាប់រវាងក្រុងហុងកុង និងអាមេរិកហើយក៏ជាបណ្តាញដំបូងដែលតភ្ជាប់ផ្ទាល់ដោយប្រើប្រាស់សមត្ថភាពនៃការបញ្ជូនទិន្នន័យខ្ពស់ (Ultra HD)»។
លោកបន្តថា៖ «វាពិតជាអស្ចារ្យណាស់ដែលក្រុមហ៊ុនបច្ចេកវិទ្យាសាកលដូចជា Google និង Facebook បានក្លាយជាសហវិនិយោគិនក្នុងក្រុមហ៊ុន PLCN»៕ TN
