បណ្ឌិតវិស្វកម្ម តាន់ រស្មី តំណាងកម្ពុជាដណ្ដើមពានរង្វាន់វិទ្យាសាស្ត្រអាស៊ាន-អាមេរិក
អ្នកស្រី តាន់ រស្មី បណ្ឌិតផ្នែកជីវវិស្វកម្ម(Bio-Engineering) មកពីប្រទេសជប៉ុន បានជាប់ជាអ្នកវិទ្យាសាស្ត្រស្ត្រីតំណាងឲ្យប្រទេសកម្ពុជាទៅប្រកួតប្រជែងជាមួយអ្នកវិទ្យាសាស្ត្រស្ត្រីដទៃទៀតមកពីបណ្ដាប្រទេសអាស៊ាន ដើម្បីដណ្ដើមយកពានរង្វាន់វិទ្យាសាស្ត្រអាស៊ាន- អាមេរិកសម្រាប់ស្ត្រី ស្ដីពីការស្រាវជ្រាវផ្នែកថាមពល។
ទាក់ទងនឹងកម្មវិធីប្រកួតប្រជែងនេះ អ្នកស្រី តាន់ រស្មី បានពន្យល់ថា ការដែលជាប់ជាតំណាងប្រទេសកម្ពុជានេះ គឺតាមរយៈការដាក់ពាក្យដោយផ្ទាល់ ដោយភ្ជាប់ជាមួយអត្ថបទវិទ្យាសាស្ត្រដែលកំពុងស្រាវជ្រាវទាក់ទងនឹងថាមពលកកើតឡើងវិញ ប្រវត្តិនៃបទពិសោធន៍ការងារ និងលិខិតឧទ្ទិសនាមពីសាស្ត្រាចារ្យផ្នែកវិទ្យាសាស្ត្រ។
អ្នកគ្រូបានបន្ថែមទៀតថា គោលបំណងសំខាន់នៃការប្រកួតប្រជែងនេះមានដូចជា ជួយគាំទ្រដល់ស្ត្រីដែលទើបចាប់ផ្ដើមអាជីពជាអ្នកវិទ្យាសាស្ត្រ ឬអ្នកស្រាវជ្រាវ។ មួយទៀតគឺចង់លើកទឹកចិត្តដល់ស្ត្រីវ័យក្មេងដទៃទៀតឲ្យចូលរួមកាន់តែច្រើនឡើងក្នុងវិស័យមួយនេះ។
តាមរយៈឯកសារយោងរបស់កម្មវិធីពានរង្វាន់វិទ្យាសាស្ត្រ អាស៊ាន-អាមេរិកសម្រាប់ស្ត្រី បានបង្ហាញថា គណៈកម្មការនឹងវាយតម្លៃលើបេក្ខនារីដោយផ្ដោតទៅលើកត្តាមួយចំនួនដូចជា៖
ទី១៖ សារៈសំខាន់នៃប្រធានបទស្រាវជ្រាវ។
ទី២៖ ភាពមានទំនាក់ទំនងគ្នានៃប្រធានបទស្រាវជ្រាវទៅនឹងគោលបំណងនៃអាស៊ានស្ដីពីថាមពលកកើតឡើងវិញ។
ទី៣៖ គឺកិច្ចការងាររបស់បេក្ខនារីក្នុងការប្រឹងប្រែងលើកទឹកចិត្តស្ត្រីវ័យក្មេងអោយចូលរួមក្នុងវិស័យមួយនេះ។
មិនតែប៉ុណ្ណោះ បន្ទាប់ពីជាប់វគ្គជម្រុះចុងក្រោយហើយ គណៈកម្មការតម្រូវឲ្យផ្ញើជាវីដេអូសង្ខេប៣នាទី ហើយក៏អាចមានកិច្ចសម្ភាសន៍ដោយផ្ទាល់ជាមួយគណៈកម្មការផងដែរ សម្រាប់ធ្វើការវាយតម្លៃ ដើម្បីឈានទៅរកជយលាភីចុងក្រោយ។
សូមបញ្ជាក់ផងដែរថា កម្មវិធីពានរង្វាន់វិទ្យាសាស្ត្រ អាស៊ាន- អាមេរិកសម្រាប់ស្ត្រីស្ដីពីថាមពល អាចនឹងធ្វើការប្រកាសលទ្ធផលនាវគ្គផ្ដាច់ព្រ័ត្រ នៅអំឡុងខែតុលាឆ្នាំ២០១៦ខាងមុខនេះហើយ។
សព្វថ្ងៃនេះ បណ្ឌិត តាន់ រស្មី គឺជាគ្រូបង្រៀន និង ជាអ្នកស្រាវជ្រាវមួយរូបផ្នែកជីវវិស្វកម្មទាក់ទងនឹងថាមពលកកើតឡើងវិញ( Sustainable Engergy) ប្រចាំដេប៉ាតេម៉ង់ទេពកោសល្យ គីមី និងអាហារនៃវិទ្យាស្ថានបច្ចេកវិទ្យាកម្ពុជា (ITC)។
ការសិក្សាស្រាវជ្រាវរបស់អ្នកគ្រូមានរយៈពេលជាង៣ឆ្នាំ គឺផ្ដោតទៅលើការបំបែកកាកសំណល់ភក់រឹង (Sludge) ដែលបានមកពីការសំអាតទឹកកខ្វក់របស់រោងចក្រចំណីអាហារ រួចបម្លែងអោយទៅជាជីវឧស្ម័នសម្រាប់ចំហេះ។
ជាលទ្ធផលសម្រាប់ការស្រាវជ្រាវ អ្នកគ្រូបានរកឃើញថា លក្ខខណ្ឌរួមផ្សំគ្នាដោយការប្រើកម្ដៅ និងPH ខ្ពស់(មជ្ឈដ្ឋានបាសខ្លាំង) នាំឲ្យមានការបំបែកកាកសំណល់លឿន មានប្រសិទ្ធភាពខ្ពស់ ព្រមទាំងអាចផលិតជាជីវឧស្ម័នបានច្រើនទៀតផង។ ចំណែកការបម្លែងទៅជាជីវឧស្ម័នវិញ គឺគេត្រូវធ្វើនៅលក្ខខណ្ឌPHស្មើ៧។
អត្ថបទ៖ ស៊ិន ចន្ថាnews.sabay
