ទង់ជាតិចិន និងអាមេរិក។ (រូបថត AFP)
- ដោយ: អ៊ុម វ៉ារី
- ប្រធានបទ: គំនិតមួយ
ប្រទេសមហាអំណាចចិន ជាប្រទេសដឹកនាំតាមលិទ្ធិ «កុម្មុយនីស» ឯប្រទេសមហាអំណាចផ្នែក «សេរី» ជាសហរដ្ឋអាមេរិក។ ប្រទេសមហាអំណាចធំៗទាំងពីរ នេះក៏កំពុងតែសម្លឹងមើលមកកម្ពុជា ក្នុងហេតុផល ផលប្រយោជន៍ កេរ្តិ៍ឈ្មោះ និងអំណាច។ មហាអំណាចទាំងពីរនេះ ក៏កំពុងប្រលងប្រណាំងគ្នា ដើម្បីទាញយកប្រជាប្រិយភាព ភាពជឿជាក់ និងការទុកចិត្តពីប្រទេសកម្ពុជាផងដែរ។
លោក កែម ឡី អ្នកស្រាវជ្រាវការអភិវឌ្ឍសង្គម បានធ្វើការបញ្ជាក់ថា ប្រទេសទាំងពីរនេះ សំខាន់សម្រាប់ប្រទេសកម្ពុជាដូចគ្នា ហើយក៏នឹងផ្តល់ផលប្រយោជន៍ មកកម្ពុជាដូចគ្នាដែរ គ្រាន់តែក្នុងទិសដៅខុសគ្នាប៉ុណ្ណោះ។ លោកបន្តថា តែយ៉ាងណាក៏ដោយ បើកម្ពុជាខ្លួនឯងចេះធ្វើទំនាក់ទំនង ឬពឹងផ្អែកលើប្រទេសមហាអំណាចទាំងពីរនេះ នោះកម្ពុជាក៏នឹងទទួលបានផលប្រយោជន៍ យ៉ាងក្រាសក្រែល ដែលមិននឹកស្មានដល់។
ក្នុងជំនួបជាមួយពលរដ្ឋ ក្នុងវត្តសាមគ្គីរង្សី អ្នកស្រាវជ្រាវការអភិវឌ្ឍន៍សង្គមរូបនេះ បានបញ្ជាក់ថា បច្ចុប្បន្ននេះ កម្ពុជាមាននិន្នាការពីរ ក្នុងការសម្រេចចិត្ត ពីការពឹងផ្អែកលើបរទេស។ លោកបានបញ្ជាក់ដូច្នេះថា «ផ្លូវ»សំខាន់ពីរយ៉ាងដែលកម្ពុជាត្រូវដើរ និងដើរទន្ទឹមគ្នានោះ គឺ៖
- ផ្លូវទីមួយ កម្ពុជាត្រូវចាប់ដៃគូជាមួយប្រទេសចិន ដើម្បីស្វែងរកឱកាសទាមទាយកដី ដែលប្រទេសវៀតណាមបានលេបត្របាក់យកទៅ នារយៈកាលកន្លងមក រួមមានកោះត្រល់ជាដើម។
- ផ្លូវទីពីរ កម្ពុជាត្រូវចាប់ដៃគូ ជាមួយសហរដ្ឋអាមេរិក ដែលជាប្រទេសប្រជាថិបតេយ្យធំជាងគេ នោះកម្ពុជាក៏នឹងទទួលបាន នូវការគោរពសិទ្ធិមនុស្ស ការគោរពច្បាប់ និងនីតិរដ្ឋនៅកម្ពុជា។
ទស្សនាវដ្តីមនោរម្យ.អាំងហ្វូ នៅមិនអាចស្វែងរកប្រតិកម្មបន្ថែម ចំពោះការលើកឡើងខាងលើ ពីមន្រ្តីរដ្ឋាភិបាល ឬពីមន្ត្រីនៃគណបក្សប្រជាជនកម្ពុជា និងគណបក្សសង្គ្រោះជាតិបាននៅឡើយ ក្នុងថ្ងៃនេះ៕
ប្រភពmonoroom
