ថ្ងៃទី០៩ ខែកញ្ញា ឆ្នាំ២០១៦
សាធារណរដ្ឋប្រជាមានិតប្រជាធិបតេយ្យកូរ៉េ ឬអ្វីដែលមនុស្សជាច្រើនហៅថាកូរ៉េខាងជើងនោះ ពេលនេះបានប្រកាសជាសកលហើយ ដើម្បីបញ្ជាក់ពីរំញ័រកម្រិត៥.៣វ៉ិចទ័រ ដែលបានកើតឡើងកាលពីព្រឹកថ្ងៃនេះ ដោយវាជាលទ្ធផលនៃការសាកល្បងអាវុធនុយក្លេអ៊ែរជាលើកទី៥របស់ខ្លួន ដែលទទួលបានការជោគជ័យដ៏សម្បើម ហើយវាអាចបញ្ជាក់ថា ក្ដីសុបិនដ៏យូរអង្វែងរបស់ក្រុងព្យុងយ៉ាង ពេលនេះក្លាយជាការពិតហើយ ។
"ក្បាលគ្រាប់នុយក្លេអ៊ែរដែលមានកម្រិតស្ដង់ដារ និងបទដ្ឋានត្រឹមត្រូវ នឹងជួយឲ្យកូរ៉េខាងជើង (DPRK) ផលិតវាក្នុងពេលណាក៏បាន បរិមាណប៉ុណ្ណាក៏បាន កាន់តែតូច កាន់តែស្រាល និងក្បាលគ្រាប់នុយក្លេអ៊ែរជាច្រើនប្រភេទ ដែលមានសមត្ថភាពវាយប្រហារខ្ពស់" នេះជាសេចក្ដីប្រកាសរបស់ព្យុងយ៉ាង ដែលបានចុះផ្សាយដោយសារព័ត៌មានរដ្ឋ KCNA ។
ការសាកល្បងអាវុធនុយក្លេអ៊ែរលើកនេះ មិនបានសាយភាយសារធាតុនុយក្លេអ៊ែរទេ ដូច្នេះវាគ្មានផលអាក្រក់ដល់បរិស្ថានឡើយ ។ សូមរម្លឹកថា គ្រាន់តែមានការរញ្ជួយដីកម្រិត៥.៣វ៉ិចទ័រភ្លាម ទីក្រុងសេអ៊ូលបានបង្ហាញពីការព្រួយបារម្ភ ចំពោះលទ្ធភាពនៃការសាកល្បងនុយក្លេអ៊ែររួចបាត់ទៅហើយ ដោយបន្ទុះនុយក្លេអ៊ែរលើកនេះ ធ្វើឲ្យកើតមានរំញ័រខ្លាំងជាងបន្ទុះកាលពីខែមករា ០.២វ៉ិចទ័រ ។
ភ្លាមៗក្រោយទទួលបានការបញ្ជាក់ ពីការសាកល្បងអាវុធនុយក្លេអ៊ែរនេះ កូរ៉េខាងត្បូង ជប៉ុន និងអាមេរិក បានរៀបគម្រោងនឹងបើកកិច្ចប្រជុំត្រីភាគីមួយ ដើម្បីពិភាក្សាគ្នា ស្ដីពីជោគជ័យនៃការសាកល្បងនុយក្លេអ៊ែររបស់ព្យុងយ៉ាង ទាំងដែលនៅទីក្រុងសេអ៊ូលឯណោះវិញ នាយករដ្ឋមន្ត្រីកូរ៉េខាងត្បូង លោក Hwang Kyo-ahn បានបើកកិច្ចប្រជុំបន្ទាន់ភ្លាមៗ ជាមួយក្រុមប្រឹក្សាសន្តិសុខជាតិ ស្ដីពីបញ្ហានេះដូចគ្នា ។
ដោយឡែកភាគីចិន ដែលជាសម្ព័ន្ធមិត្តដ៏ជិតដិតបំផុតរបស់ទីក្រុងព្យុងយ៉ាងវិញ គេក៏បានបង្ហាញគោលជំហរប្រឆាំងនឹងទង្វើរបស់កូរ៉េខាងជើងមួយនេះដែរ ហើយទន្ទឹមគ្នានេះ សេតវិមានអាមេរិកក៏ចេញសេចក្ដីប្រកាសមួយ ស្ដីពីការបើកកិច្ចប្រជុំជាមួយសម្ព័ន្ធមិត្តរបស់ខ្លួនក្នុងតំបន់នោះដែរ ដើម្បីតាមមើលស្ថានការណ៍ និងការវិវត្តន៍របស់កូរ៉េខាងជើង ៕
North Korea says capable of mounting nuclear weapon on ballistic missile, in statement confirming fifth test. pic.twitter.com/dvZuIz9A1L— James Pearson (@pearswick) September 9, 2016
