រូបតំណាង បង្ហាញពីសកម្មភាពនៃការធ្វើការរបស់កម្មករនៃជាតិសាសន៍មួយ។
Wed, 31 August 2016
ភ្នំពេញៈ «ខ្មែរសុទ្ធសាធខ្ចិល និងឥតគំនិត» គឺជាទស្សនៈដែលកើតមាននៅក្នុងសង្គមកម្ពុជាជាយូរមកហើយ ជាពិសេសនៅក្នុងចំណោមប្រជាពលរដ្ឋដែលជាប់សែស្រឡាយចិន ឬ វៀតណាម ដែលជាទូទៅត្រូវបានគេចាត់ទុកថា ជាអ្នកពូកែរកស៊ី និងខិតខំធ្វើការ។
ខណៈមិនអាចបញ្ជាក់បានពីប្រភពកកើតច្បាស់លាស់នៃទស្សនៈនេះ ប្រជាជនដែលមានសាច់ឈាមជាខ្មែរសុទ្ធសាធភាគច្រើនត្រូវបានគេចាត់ទុកថា ជាមនុស្សដែលខ្ចិលច្រអូស មិនមានគំនិតច្នៃប្រឌិត និងមិនសូវប៉ិនប្រសព្វក្នុងការប្រកបអាជីវកម្ម។
ថៅកែហាងធំមួយនៅក្នុងរាជធានីភ្នំពេញដែលសុំមិនបញ្ចេញឈ្មោះបាននិយាយថា៖ «បើខ្ញុំមានកូនស្រី ខ្ញុំមិនឲ្យវាការជាមួយនឹងខ្មែរសុទ្ធនោះទេ។ ខ្ញុំមិនមែនមើលងាយខ្មែរនោះទេ ក៏ប៉ុន្តែវាគឺជាតថភាពពិត។ ខ្មែរមិនចេះរកស៊ីទេ ធ្វើការចង់តែស្រណុក បើមានលុយគឺយកតែផឹកស្រា។ ខ្ញុំដឹងច្បាស់ព្រោះកម្មកររបស់ខ្ញុំគឺសុទ្ធតែជាខ្មែរសុទ្ធទាំងអស់»។
ទោះបីជាយ៉ាងណា ទស្សនៈនេះត្រូវបានច្រានចោល ព្រមទាំងបង្ហាញលើកភស្តតាងមកបង្ហាញដោយលោក លោក អោម សេងបូរ៉ា ស្ថាបនិក និងអគ្គនាយកក្លិបអ្នកជំនួញឈ្មោះ CEO Master Club និងជាសហគ្រិនវ័យក្មេងមួយរូប ដែលរូបលោកក៏ជាកូនខ្មែរសុទ្ធសាធម្នាក់ផងដែរ។
ក្នុងបទសម្ភាសន៍មួយជាមួយនឹងនិពន្ធនាយកភ្នំពេញប៉ុស្តិ៍កាលពីខែមុន លោក អោម សេងបូរ៉ា បាននិយាយថា៖ «ខ្ញុំទទួលស្គាល់កូនចៅចិនពូកែរកស៊ី ក៏ប៉ុន្តែវាមិនមែនមកពីហ្សែននោះទេ គឺពួកគេបានរស់នៅធំដឹងក្តីនៅក្នុងបរិស្ថានគ្រួសារដែលជំរុញកូនចៅឲ្យស្រលាញ់ការរកស៊ី»។
លោកបានពន្យល់ថា ដូចគ្នានេះដែរ ហ្សែនខ្មែរមិនមែនហ្សែនខ្ចិល ឬអត់គំនិតនោះទេ។ ទោះបីជាលោកជាខ្មែរសម្បុរខ្មៅ តែលោកបានក្លាយជាសហគ្រិនដ៏ប៉ិនប្រសព្វមួយរូប ដោយសារតែលោកខិតខំធ្វើការ ក៏ដូចជាសិក្សាស្វែងយល់ និងបណ្តុះគំនិតក្នុងការប្រកបអាជីវកម្ម។ សម្រាប់ មិនថាខ្មែរ ឬចិន សុទ្ធតែអាចខ្ចិល និងអត់គំនិតបានទាំងអស់។
ក្រឡេកមើលមកប្រវត្តិសាស្រ្តកម្ពុជាវិញ អ្នកប្រវត្តិសាស្រ្តបរទេសជាច្រើនបានលើកឡើងនូវទស្សនៈ «ខ្មែរខ្ចិល» នៅក្នុងស្នាដៃនិពន្ធរបស់ខ្លួន។
នៅក្នុងសៀវភៅ «ក្មេងសាលាបារាំង» លោក ជុត ខៃ ជាអតីតអ្នករដ្ឋការ និងអ្នកនិពន្ធជើងចាស់ម្នាក់របស់កម្ពុជា បានឲ្យដឹងថា ជនបរទេសមួយចំនួនបានសរសេរថា កម្ពុជាមានធនធានធម្មជាតិដ៏សម្បូរបែប ក៏ប៉ុន្តែធនធានទាំងនេះបានធ្វើឲ្យប្រជាពលរដ្ឋរស់នៅស្រួលរហូត «ភ្លេចគិតនឹកនាដល់ការអភិវឌ្ឍរបស់ប្រទេសជិតខាង»។
ក៏ប៉ុន្តែការលើកឡើងនេះត្រូវបានបដិសេធដោយ លោក សំបូរ ម៉ាណារ៉ា ជាសាស្រ្តាចារ្យ និងអ្នកស្រាវជ្រាវមួយរូបរបស់កម្ពុជា។
នៅក្នុងបទសម្ភាសន៍មួយជាមួយ LIFT កាលពីថ្ងៃសុក្រសប្តាហ៍មុន លោកបាននិយាយថា៖« នៅក្នុងទំព័រ ៣៩ នៃសៀវភៅប្រវត្តិសាស្រ្តខ្មែរ របស់លោក David Chandler បានសរសេរថា «ខ្មែរជាជាតិសាសន៍មួយខ្ចិលនិងស្តាប់បង្គាប់»។ ក៏ប៉ុន្តែ ខ្ញុំចងសួរថា ប្រសិនជាខ្មែរខ្ចិលនឹងអត់គំនិត តើខ្មែរសាងសង់អង្គរវត្តបានដែរឬ? ខ្មែរក៏អាចឧស្សាហ៍ ហើយចិន ឬ វៀតណាមក៏អាចខ្ចិលបានគ្នា»។
លោកបានបន្តថា៖ «យើងមិនអាច ហើយក៏មិនគួរវាយតម្លៃលើជាតិសាសន៍ណាមួយដោយផ្នែកលើទស្សនៈណាមួយ ថាយ៉ាងណាៗនោះឡើយ។ តាមខ្ញុំយល់ ផ្នត់គំនិតថា ខ្មែរខ្ចិល ខ្មែរអត់គំនិតនេះ កើតចេញពីកំអែលអាណានិគមបារាំងដែលមើលឃើញខ្មែរមួយចំនួន ធ្វើការមិនសូវឡះសម្រាប់ខ្លួន ដូចចិន ឬវៀតណាម»៕
ប្រភព.postkhmer
