"ទេសចរមកទស្សនាខេត្តសៀមរាបធ្លាក់ចុះបន្ទាប់ពីមានការបាញ់សម្លាប់បណ្ឌិត កែម ឡី"
ដោយ ហង្ស សាវយុត RFA 2016-08-09
ក្នុងខែសីហា នេះ ក្រុមមគ្គុទ្ទេសក៍ទេសចរណ៍ជាច្រើន ដែលធ្លាប់តែនាំភ្ញៀវដើរកម្សាន្តនៅតាមរមណីយដ្ឋានអង្គរក្នុងខេត្តសៀមរាប ហាក់ដូចជាទំនេរច្រើនជាងកាលពី ២-៣ខែមុន។ ការទំនេរនេះ បណ្ដាលមកពីតួលេខភ្ញៀវទេសចរមកពីតំបន់អាមេរិក និងអឺរ៉ុប មានការថយចុះមួយកម្រិតគួរឱ្យចាប់អារម្មណ៍។ ក្រុមមគ្គុទ្ទេសក៍ទេសចរណ៍ខ្លះដែលតែងនាំភ្ញៀវដើរកម្សាន្តនៅតាមរមណីយដ្ឋានអង្គរ បានកត់សំគាល់ឃើញថា ចំនួនភ្ញៀវទេសចរបរទេសដែលមកពីតំបន់អឺរ៉ុប និងអាមេរិក បានថយចុះមួយកម្រិតក្នុងរយៈពេលជិត ១ខែមកនេះ។ ពួកគេយល់ឃើញថា បញ្ហាដែលឃាតកបាញ់សម្លាប់លោកបណ្ឌិត កែម ឡី ជាអ្នកវិភាគបញ្ហាសង្គមដ៏មានប្រជាប្រិយនៅកណ្ដាលទីក្រុងភ្នំពេញ វាអាចជះឥទ្ធិពលខ្លះៗ ទៅដល់ភ្ញៀវទេសចរបរទេសទាំងនោះ មិនចង់ឱ្យពួកគេធ្វើដំណើរមកកម្សាន្តនៅកម្ពុជា។ មគ្គុទ្ទេសក៍ទេសចរណ៍និយាយភាសាអង់គ្លេសម្នាក់ ក្នុងចំណោមមគ្គុទ្ទេសក៍ខ្លះទៀត គឺលោក ព្រហ្ម សុវណ្ណ។ លោកមានប្រសាសន៍កាលពីព្រឹកថ្ងៃច័ន្ទ ទី៨ ខែសីហា ថា តាមលោកសង្កេតរយៈពេលជិត ១ខែមកនេះ ឃើញចំនួនភ្ញៀវទេសចរបរទេសមកពីតំបន់អឺរ៉ុប និងអាមេរិក ជាដើមមិនសូវសំបូរមកទស្សនាខេត្តសៀមរាប ទេ។ មគ្គុទ្ទេសក៍ទេសចរណ៍ដដែលបញ្ជាក់ថា តាមលោកយល់ទំនងជាការបាញ់សម្លាប់លោកបណ្ឌិត កែម ឡី ជាអ្នកវិភាគបញ្ហាសង្គមកន្លងមក អាចធ្វើឱ្យប៉ះពាល់ដល់អារម្មណ៍ភ្ញៀវទេសចរខ្លះមកពីតំបន់អឺរ៉ុប និងអាមេរិក។ មូលហេតុដែលលោកយល់ឃើញដូច្នេះ ពីព្រោះមានភ្ញៀវទេសចរខ្លះ ពេលលោកជូនដើរកម្សាន្ត បាននិយាយពីរឿងឃាតកម្មទៅលើលោកបណ្ឌិត កែម ឡី ព្រមទាំងសួរថា តើប្រទេសកម្ពុជា មានច្បាប់ដែរឬក៏យ៉ាងណា បានជាមានការបាញ់សម្លាប់មនុស្សដោយមិនខ្លាចញញើតដូច្នេះ៖ «ភ្ញៀវខ្លះគាត់តាមដាននយោបាយនៅកម្ពុជា គាត់យល់ដឹងច្រើនណាស់ ជាងប្រជាពលរដ្ឋដែលរស់នៅស្រុកខ្មែរ។ មានភ្ញៀវមួយចំនួនក៏សួរពាក់ព័ន្ធនឹងរឿងបាញ់សម្លាប់លោកបណ្ឌិត កែម ឡី ដែរ»។ លោកបណ្ឌិត កែម ឡី ជាអ្នកវិភាគបញ្ហាសង្គមដ៏មានប្រជាប្រិយ ត្រូវឃាតកបាញ់សម្លាប់កាលពីថ្ងៃទី១០ ខែកក្កដា ក្នុងហាងស្តារម៉ាត (Star Mart) មួយកន្លែងម្ដុំស្ដុបបូកគោ នៃខណ្ឌចំការមន កណ្ដាលទីក្រុងភ្នំពេញ។ បើទោះបីជាមគ្គុទ្ទេសក៍ទេសចរណ៍មួយចំនួនយល់ឃើញថា ចំនួនភ្ញៀវទេសចរបរទេសដែលមកទស្សនាអង្គរបានថយចុះ រយៈពេលជិត ១ខែចុងក្រោយនេះ ទំនងជាប៉ះពាល់ដោយសារហេតុការណ៍បាញ់សម្លាប់លោកបណ្ឌិត កែម ឡី ក៏ដោយ ក៏មន្ត្រីក្រសួងទេសចរណ៍អះអាងថា វាមិនមែនដូច្នេះទេ។ រដ្ឋមន្ត្រីក្រសួងទេសចរណ៍ លោក ថោង ខុន បានឆ្លើយតបថា លោកហាក់មិនបានទទួលព័ត៌មានអំពីបញ្ហាចំនួនភ្ញៀវទេសចរបរទេសថយចុះ បណ្ដាលមកពីការភ័យខ្លាចដោយសារតែមានព្រឹត្តិការណ៍បាញ់សម្លាប់លោកបណ្ឌិត កែម ឡី នោះឡើយ៖ «ពីព្រោះករណីហ្នឹង មិនមែនជាករណីពិសេស ដែលធ្វើឱ្យភ្ញៀវគេចាប់អារម្មណ៍ទេ។ ខ្ញុំមិនបានទទួលព័ត៌មានពីបញ្ហាហ្នឹងទេ»។ងណា មន្ត្រីនៃសមាគមទីភ្នាក់ងារទេសចរណ៍កម្ពុជា ចាប់តាំងពីប្រធានអនុប្រធាន និងអគ្គលេខាធិការមិនទាន់ហ៊ានឆ្លើយតបចំពោះបញ្ហានេះយ៉ាងណានៅឡើយ ដោយគេអះអាងថា កំពុងជាប់រវល់ប្រជុំ។ ចំណែកមន្ត្រីក្រសួងទេសចរណ៍ បានអះអាងថា រយៈពេលជាង ១ខែចុងក្រោយនេះពិតជាចំនួនភ្ញៀវទេសចរធ្លាក់ចុះបន្តិចមែន ក៏ប៉ុន្តែមិនមែនប៉ះពាល់ពីឥទ្ធិពលឃាតកដែលបាញ់សម្លាប់លោកបណ្ឌិត កែម ឡី ទេ គឺដោយសារតែខែនេះជារដូវភ្លៀងធ្លាក់ខ្លាំង ធ្វើឱ្យអ្នកទេសចរបរទេសមិនចង់ដើរកម្សាន្ត។ បញ្ហានេះ គឺនៅប្រទេសជាច្រើនកំពុងថយចុះភ្ញៀវទេសចរដូចគ្នា។ មន្ទីរទេសចរណ៍ខេត្តសៀមរាប ឱ្យដឹងថា ក្នុងរយៈពេល ៦ខែ ឆ្នាំ២០១៦ គឺមានភ្ញៀវទេសចរបរទេសដែលចូលមកទស្សនាអង្គរចំនួនជាង ១,៩លាននាក់។ តួលេខនេះបានថយចុះ ១% បើប្រៀបធៀបទៅនឹងចំនួនភ្ញៀវទេសចរបរទេសរយៈពេល ៦ខែ ដូចគ្នាកាលពីឆ្នាំ២០១៥ កន្លងទៅ៕
