លោកស្រី ចំរើន(ស្តាំ) និងកញ្ញា ធី សុវណ្ណថា
ក្រសួងការងារ កាលពីថ្ងៃម្សិលមិញ បានព្រមានទៅកញ្ញា ធី សុវណ្ណថា និងលោក ស្រី ចំរើន ដែលបានធ្វើសកម្មភាពសហជីព ដោយមិនបានចុះបញ្ជីនៅក្រសួង។
លោក កុយ ទេពដារាវុធ ប្រធាននាយកដ្ឋានវិវាទការងារនៃក្រសួងការងារ កាលពីថ្ងៃម្សិលមិញ បានផ្ញើលិខិតមួយច្បាប់ទៅកញ្ញា ធី សុវណ្ណថា និងលោក ស្រី ចំរើន។
លោកបានចារនៅលើលិខិតនោះថា៖ «យើងសូមព្រមានចំពោះលោកស្រី ចំរើន និងកញ្ញា ធី សុវណ្ណថា ថា ត្រូវបញ្ឈប់រាល់សកម្មភាពសហជីពដោយមិនបានចុះបញ្ជីជាបន្ទាន់»។
លោកបន្តថា៖ «ក្នុងករណីនៅតែបន្តសកម្មភាពទៀត យើងនឹងអាចចាត់វិធានការដំណាក់កាលទី ២ អនុលោមតាមច្បាប់ស្ដីពីសហជីព»។
ការព្រមានរបស់ក្រសួងការងារ ទៅលើសកម្មជនទាំងពីរនេះ បានកើតឡើងតែប៉ុន្មានថ្ងៃក្រោយពីសហជីពសេរីកម្មករនៃព្រះរាជាណាចក្រកម្ពុជា បានជំរុញឲ្យក្រសួងការងារចាត់វិធានការទៅលើពួកគេ បន្ទាប់ពីពួកគេអះអាងថា ជាតំណាងសហជីព ហើយព្រមានដឹកនាំធ្វើបាតុកម្មរំលាយគណបក្សសង្គ្រោះជាតិ៕
សរសេរមកកាន់ លោក សូរ្យ ជ័យឧត្ដម តាមរយៈ oudom@vodhotnews.com
