លោក យឹម សុវណ្ណ បញ្ជាក់ថាស្ថានភាពនយោបាយជាប់គាំងប៉ះពាល់ធ្ងន់ធ្ងរទៅលើអត្ថប្រយោជន៍ជាតិទាំងមូល និងប៉ះពាល់ដល់ដំណើរការបោះឆ្នោតនាពេលខាងមុខ
មន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ជាថ្មីម្តងទៀតបានបញ្ជាក់ប្រាប់អ្នកសារព័ត៌មានថាដោយសារស្ថានភាពនយោបាយជាប់គាំងបានធ្វើឲ្យមានផលប៉ះពាល់ធ្ងន់ធ្ងរទៅលើអត្ថប្រយោជន៍ជាតិទាំងមូល ហើយវាប៉ះពាល់ដល់ដំណើរការបោះឆ្នោតនាពេលខាងមុខផងដែរ។ លោក យឹម សុវណ្ណ បានសង្កត់ធ្ងន់ថាប្រសិនបើការបោះឆ្នោតមិនសេរី និងមិនយុត្តិធម៌ដូច្នេះភាពស្របច្បាប់របស់រដ្ឋាភិបាលបន្ទាប់ពីការបោះឆ្នោតគឺជាការសង្ស័យមួយ។ ពេលនោះវានឹងប៉ះពាល់អត្ថប្រយោជន៍ជាតិធ្ងន់ធ្ងរ។ ដូច្នេះគណបក្សសង្គ្រោះជាតិសង្ឃឹមថាគណបក្សប្រជាជនកម្ពុជានឹងជួបចរចាជាមួយគណបក្សសង្គ្រោះជាតិដើម្បីដោះស្រាយបញ្ហា។
នៅចំពោះមុខអ្នកគាំទ្រ និងសកម្មជនរាប់រយនាក់នៅទីស្នាក់ការកណ្តាលគណបក្សសង្គ្រោះជាតិកាលពីម្សិលមិញ មន្ត្រីអ្នកនាំពាក្យគណបក្សសង្គ្រោះជាតិលោក យឹម សុវណ្ណ បានបញ្ជាក់ថាស្ថានភាពនយោបាយបច្ចុប្បន្នកំពុងតែលំបាកខ្លាំងឡើងៗពីមួយថ្ងៃទៅមួយថ្ងៃដែលអាចប៉ះពាល់ដល់ដំណើរការបោះឆ្នោតឆ្នាំ ២០១៧‑២០១៨ ។ លោក យឹម សុវណ្ណ បានបន្ថែមថា គណបក្សសង្គ្រោះជាតិមើលឃើញថាភាពជាប់គាំងគឺនៅចំពោះមុខ។ ដូច្នេះជំហររបស់គណបក្សសង្គ្រោះជាតិនៅតែចាត់ទុកស្ថានភាពនយោបាយនេះថាខ្មៅងងឹតហើយរាល់ករណីទាំងអស់មិនមែនជាករណីរបស់បុគ្គលទេគឺជាករណីនយោបាយដែលចាំបាច់ត្រូវដោះស្រាយឲ្យបានឆាប់ ។
លោក យឹម សុវណ្ណ មន្ត្រីអ្នកនាំពាក្យគណបក្សសង្គ្រោះជាតិដែលបានហៅស្ថានភាពនយោបាយនៅកម្ពុជាបច្ចុប្បន្នថាតានតឹងដោយសំអាងលើហេតុផលថា មានករណីមេដឹកនាំគណបក្សសង្គ្រោះជាតិ លោក សម រង្ស៊ី និង លោក កឹម សុខា កំពុងពាក់ព័ន្ធនឹងតុលាការ។ការវាយប្រហារតំណាងរាស្ត្រគណបក្សសង្គ្រោះជាតិពីរនាក់ហើយតំណាងរាស្ត្រកំពុងប្រឈមមុខនឹងការដកអភ័យឯកសិទ្ធិ និងជាប់ពន្ធនាគារខណៈដែលសមាជិក និងសកម្មជនសិទ្ធិមនុស្សដទៃៗទៀតរួមទាំងមន្ត្រីគណៈកម្មាធិការជាតិរៀបចំការបោះឆ្នោតក៏កំពុងជាប់ពន្ធនាគារផងដែរ។
ជុំវិញបញ្ហាស្ថានភាពនយោបាយសព្វថ្ងៃនេះ លោក កឹម សុខា ប្រធានស្តីទីគណបក្សសង្គ្រោះជាតិនៅថ្ងៃនេះ បានបញ្ជាក់ដែរថា ប្រទេសមួយចំនួនដែលគេមានសន្ដិភាពហើយ គេតែងតែឈឺឆ្អាលមកជួយកម្ពុជាដែលជាប្រទេសមិនទាន់មានសន្ដិភាពពិត។ នៅប្រទេសកម្ពុជា លោកសូមអំពាវនាវដល់អ្នកទាំងឡាយណាដែលថាខ្លួនបានសេចក្ដីសុខសប្បាយហើយ សូមធ្វើឲ្យអ្នកដទៃទៀតទទួលបានសេចក្ដីសុខផងដែរ ទើបហៅថាសន្ដិភាពពិតស្ថិតស្ថេរ៕
http://www.moneaksekar.com/53100.html/#more-53100
