ខ្សែប្រយុទ្ធអន្ដរជាតិកម្ពុជាប្រាក់ មុន្នីឧត្ដម (ឆ្វេង) និងលោក Lee អំឡុងសន្និសីទសារព័ត៌មាន។ ស្រេង ម៉េងស្រ៊ុន
កម្ពុជា ប្តូរយុទ្ធសាស្ត្រពេលជួបឆាយនីសតៃប៉ិល្ងាចនេះ
ភ្នំពេញ: ក្រុមបាល់ទាត់ជម្រើសជាតិកម្ពុជា នឹងផ្លាស់ប្តូរយុទ្ធសាស្ត្រសម្រាប់ការជួបជាមួយនឹងក្រុមបាល់ទាត់ជម្រើសជាតិឆាយនីសតៃប៉ិ នាល្ងាចនេះ ក្នុងការប្រកួតជើងទី ២ នៃព្រឹត្តិការណ៍ Asian Cup វគ្គ Playoff នៅកីឡដ្ឋានអូឡាំពិក ក្រោយពីក្រុមទាំងពីរបានបញ្ចប់ក្នុងលទ្ធផលស្មើ ២-២ ក្នុងជើងទី ១ កាលពីសប្តាហ៍មុន ក្នុងទីក្រុង Kaohsiung។ នេះបើយោងទៅតាមលោកគ្រូបង្វឹក Lee Tae Hoon។
ក្នុងសន្និសីទសារព័ត៌មានមួយនៅរាជធានីភ្នំពេញ កាលពីព្រឹកថ្ងៃម្សិលមិញ ដែលក៏ត្រូវបានចូលរួមដោយលោក Toshiyaki Imai គ្រូបង្វឹកក្រុម ឆាយនីសតៃប៉ិ លោក Lee គ្រូបង្វឹករបស់ក្រុមកម្ពុជា បានបញ្ជាក់ថា វានឹងក្លាយជារឿងដ៏គ្រោះថ្នាក់សម្រាប់ក្រុមដែលមានរហស្សនាមថា អ្នកចម្បាំងអង្គររបស់លោកក្នុងការលេងដោយផ្តោតតែការពារ ក្រោយពីមានប្រៀបដោយសារតែគ្រាប់បាល់ក្រៅដី។
លោក Lee Tae Hoon បានប្រាប់ភ្នំពេញ ប៉ុស្តិ៍ ថា៖ «យើងមិនអាចឈានទៅកាន់ការប្រកួតនេះជាមួយនឹងអារម្មណ៍ដូចគ្នាឡើយ។ ការទទួលជ័យជម្នះនឹងផ្តល់ឲ្យយើងនូវកៅអីមួយក្នុងជុំជម្រុះចុងក្រោយ និងឱកាសក្នុងការលេងជាមួយនឹងក្រុមខ្លាំងៗក្នុងតំបន់នេះ។ យើងចាំបាច់ត្រូវតែរក្សាឥរិយាបថជាវិជ្ជមាន និងប្រឹងឲ្យអស់ពីសមត្ថភាពដើម្បីឈ្នះ»។
គ្រូបង្វឹកសញ្ជាតិកូរ៉េខាងត្បូងរូបនេះ ដែលការកាន់តំណែងជាលើកទីមួយរបស់លោកក្នុងនាមជាគ្រូបង្វឹកក្រុមកម្ពុជាកាលពីឆ្នាំ ២០១៣ ហើយបច្ចុប្បន្ន កំពុងតែកាន់តំណែងជាលើកទី ៣ នោះ បានប្រាប់បន្តថា៖ «ការប្រកួតតែងតែលំបាក ប៉ុន្តែ សម្រាប់យើង ការប្រកួតក្នុងផ្ទះខ្លួនឯងនឹងកាន់តែមានភាពស្វិតស្វាញ ពីព្រោះមានការរំពឹងទុកដ៏ធំអ្នកគាំទ្រដែលមានចំនួនរហូតដល់ទៅ ៥ ម៉ឺននាក់។ ជាមួយគ្នានេះ ការគាំទ្រពីអ្នកទស្សនាដ៏ច្រើនកុះករក៏ជាកត្តាលើកទឹកចិត្តមួយដែរ»។
ដោយឡែក លោក Toshiyaki Imai បាននិយាយថា៖ «វាពិតជាការប្រកួតដ៏លំបាកមួយសម្រាប់យើង»។ ប៉ុន្តែ គ្រូបង្វឹករបស់ឆាយនីសតៃប៉ិ រូបនេះ បានទទួលស្គាល់ថា អ្នកគាំទ្រដ៏ច្រើនកុះករ នឹងក្លាយជាការប្រជែងដ៏ធំសម្រាប់ក្រុមរបស់លោក ដែលក៏ជួបបញ្ហារបួសទៅលើកីឡាករសំខាន់ៗមួយចំនួនផងដែរ។ នៅពេលសង្កត់ធ្ងន់ទៅលើឈ្មោះកីឡាករ និងទំហំនៃការរងរបួស គ្រូបង្វឹកសញ្ជាតិជប៉ុនរូបនេះបានឲ្យដឹងថា៖ «វាជារឿងសម្ងាត់។ អ្នកអាចដឹងដោយខ្លួនឯងនៅលើបញ្ជីឈ្មោះនៅថ្ងៃស្អែកនេះ»។
លោក Lee ក៏បានបដិសេធក្នុងការផ្តល់ព័ត៌មានទៅលើកីឡាករដែលអាចចូលជំនួសខ្សែបម្រើ Chantha Bin Thierry ដែលកំពុងរងពិន័យព្យួរមួយប្រកួត ក្រោយពីទទួលបានការពិន័យកាតក្រហមកាលពីជើងទីមួយ។ អ្នកគាំទ្រជាង ៥ ម៉ឺននាក់ ត្រូវបានរំពឹងទុកថា នឹងប្រមូលផ្តុំគ្នានៅកីឡដ្ឋានអូឡាំពិកនាល្ងាចស្អែកនេះ ដែលផ្សាយតាមកញ្ចក់ទូរទស្សន៍ BTV។ ការប្រកួត នឹងចាប់ផ្តើមនៅម៉ោង ៧ យប់៕IS
