Wed, 20 January 2016
ការញ៉ាំប៊ឺហ្គឺរ និងនំខេកច្រើនពេកនឹងជះឥទ្ធិពលអវិជ្ជមានទៅដល់របបដំណេករបស់លោកអ្នក នេះបើតាមក្រុមអ្នកវិទ្យាសាស្រ្ដបានចុះផ្សាយនៅក្នុងព្រឹត្តិបត្រ Journal of Clinical Sleep Medicine។
ក្រុមអ្នកស្រាវជ្រាវបានលើកឡើងថា អាហារជាតិស្ករ និងខ្លាញ់អាចមានផលរំខានទៅដល់ដំណេករបស់អ្នក។
ភ័ស្តុតាងទាំងនោះក៏ត្រូវបានរកឃើញដែរថា មនុស្សដេកមិនសូវលក់ស្កប់ស្កល់ឡើយបន្ទាប់ពីទទួលទានអាហារមានជាតិខ្លាញ់ និងស្ករមក។ តែបើអាហារមានជាតិសរសៃ ឬហ្វៃប៊ើរ វិញអាចជួយមនុស្សរហ័សងងុយគេង ឆាប់ដេកលង់លក់ និងមានអារម្មណ៍ថាស្រួលខ្លួនទៀតផង។
អ្នកស្រីវេជ្ជបណ្ឌិត ម៉ារី ព្យែរស្តុង មកពីសាកលវិទ្យាល័យកូឡុំប៊ី អះអាងថា៖ «ការរកឃើញដ៏ចម្បងរបស់យើងគុណភាពអាហារមានឥទ្ធិពលទៅនឹងរបបដំណេក»។
អ្នកស្រីវេជ្ជបណ្ឌិត បន្ដថា៖ «វាគួរឲ្យភ្ញាក់ផ្អើលណាស់ដែលរយៈពេលមួយថ្ងៃសោះ អាហារដែលមានជាតិខ្លាញ់ និងជាតិហ្វៃប៊ើរ តិចក៏អាចមានឥទ្ធិពលដំណេកដែរ»។
លោក ណាថានីញ៉ែល វ៉តសុន មកពីគ្រឹះស្ថានសុខាភិបាលអាមេរិក AASM ថា៖ «ការស្រាវជ្រាវនេះ សង្កត់ធ្ងន់លើរបបអាហារ ដែលពាក់ព័ន្ធនឹងដំណេកដើម្បីសុខភាព»។
អាហារសម្បូរជាតិសរសៃនោះរួមមានដូចជាផ្លែសារី ប៉ោម ដំឡូង (ទាំងសម្បក) ចេក ក្រូច ស្រ្តូប៊ើរី សណ្តែកបារាំង ប្រូខូលី ពោត ប៉េងប៉ោះ និងការ៉ុត ជាដើម៕PR
