អង់គ្លេសប្រឈមថ្ងៃអវសានក្នុងរយៈពេល ៣០ ឆ្នាំទៀត
- បច្ចេកវិជ្ជា
- July 19, 2016 06:20AM
- 1
យោងតាមការព្យាករណ៍អំពីថ្ងៃអវសានដោយសារបម្រែបម្រួលអាកាសធាតុ ក្នុងរយៈពេល ៣០ ឆ្នាំទៀតប្រទេសអង់គ្លេសនឹងត្រូវបំផ្លិចបំផ្លាញដោយសារអាកាសធាតុក្ដៅស្ទើរឆេះ ទឹកជំនន់ និងកង្វះស្បៀងអាហារ។ នេះបើតាមវេបសាយ Metro ចេញថ្ងៃទី ១៨ ខែកក្កដា។
អង់គ្លេសនឹងប្រឈមកម្ដៅកើនដល់ ៤៨ អង្សា ហើយដីប្រេះបែកក្រហែង ហួតទឹកមិនអាចធ្វើកសិកម្មបាន និងខ្វះទឹកសាបប្រើប្រាស់។
អ្នកជំនាញព្រមានថាកង្វះស្បៀងអាហារអាចនឹងកើតឡើង ខណៈដែលសង្គ្រាមនិងការធ្វើចំណាកស្រុក បង្កឡើងដោយការផ្លាស់ប្ដូរអាកាសធាតុអាចប៉ះពាល់ពាណិជ្ជកម្មផងដែរ។
ការរកឃើញនេះចេញផ្សាយដោយ UK Climate Change Risk Assessment 2017 ជាមួយនឹងអ្នកជំនាញអាកាសធាតុ ៨ នាក់ ដែលទស្សន៍ទាយថាសីតុណ្ហភាពនឹងឡើងដល់ ៤០ អង្សាឡើងទៅក្នុងរយៈពេល ៣០ ឆ្នាំទៀតនៅអង់គ្លេស។
ក្នុងឆ្នាំ ២០០៣ ធ្លាប់ឡើងកម្ដៅរហូតដល់ទៅ ៣៨,៥ អង្សា ហើយនិន្នាការនេះនឹងបន្ដរហូតដល់ឆ្នាំ ២០៤០ ហើយចំនួនមនុស្សស្លាប់នឹងកើនមួយទ្វេជាបី។
នៅត្រឹមឆ្នាំ ២០៥០ តម្រូវការទឹកនឹងលើសពីការផ្គត់ផ្គង់ ២,៥ ដងក្នុងផ្នែកខ្លះនៃប្រទេសអង់គ្លេស។
ទឹកជំនន់បានធ្វើឱ្យប្រទេសអង់គ្លេសខាតបង់ ១,៣៣ ពាន់លានដុល្លាររៀងរាល់ឆ្នាំ ប៉ុន្ដែ ៣៥ ឆ្នាំទៀត ចំនួនផ្ទះស្ថិតក្នុងហានិភ័យផ្ទះលិចទឹកនឹងធ្វើឱ្យខាតបង់រហូតដល់ ២,៥ ពាន់លានដុល្លារ។
អង់គ្លេសអាចនឹងរងការវាយប្រហារពីវីរុសហ្ស៊ីកា ខណៈដែលមូសខ្លាអាស៊ីនឹងធ្វើដំណើរចូលមកក្រោមលក្ខខណ្ឌអាកាសធាតុក្ដៅ។
ក្រុមអ្នកជំនាញបានផ្ដោតលើការទស្សន៍ទាយរបស់ពួកគេលើស្ថានភាពកម្តៅដែលចេះតែកើនឡើងនាពេលបច្ចុប្បន្ននេះ៕
ប្រភព៖ Metro
