អតីតម្ចាស់ខែ្សក្រវាត់ ISKA ពិភពលោក អេ ភូថង បង្ហាញទស្សនៈផ្ទាល់ខ្លួនពីកម្រិតក្បាច់គុនអ្នកប្រដាក់ជំនាន់ថ្មី ឡៅ ចន្ទ្រា ថាបើបន្តតាំងចិត្តប្រឹងហ្វឹកហាត់ទៀត អ្នកប្រដាល់រូបនេះ នឹងអាចធ្វើឲ្យកក្រើកក្នុងកម្មវិធីធំៗលើឆាកអន្តរជាតិ រួមទាំងសង្វៀន Thai Fight ។
លោក អេ ភូថង
អតីតកីឡាករមានដើមកំណើតមកពីខេត្តកោះកុងរូបនេះ បានឲ្យដឹងថា បើតាមការមើលឃើញរបស់លោកសមត្ថភាពរបស់ ឡៅ ចន្ទ្រា បច្ចុប្បន្នល្អគ្រប់ក្បាច់ទាំងកម្លាំង និងចលនាប្រកួត។ បទពិសោធន៍លើសង្វៀនច្រើនគួរសម ព្រមទាំងមានការខំប្រឹងប្រែងហ្វឹកហាត់ ការព្យាយាមរបស់គេ បើគេរក្សាបន្តទៀត ក្នុងរយៈពេលខ្លីខាងមុខនេះ គេនឹងអាចធ្វើឲ្យកក្រើកកម្មវិធីធំៗ ពិសេសគឺ Thai Fight តែម្ដង។
បុរសប្រឹងប្រែងក្នុងវិស័យប្រដាល់ជាងពាក់កណ្ដាលជីវិតរូបនេះបន្តថា ប្រសិនបើយុវជនរូបនេះថែរក្សាខ្លួនឲ្យបានល្អបន្តទៀត ពិតណាស់ គេនឹងអាចលើកមុខមាត់ក្បាច់គុនខ្មែរលើឆាកអន្តរជាតិធំៗបាន។ ពិសេសជាងនេះទៀត ចន្រ្ទា ត្រូវការការតាំងចិត្តប្រលូកប្រដាល់បន្តទៀត ដើម្បីអាចបង្ហាញខ្លួននៅ Thai Fight ដែលអ្នកប្រដាល់ខ្មែរគ្រប់រូបស្រមៃចង់ចូលរួម។
លោក អេ ភូថង បច្ចុប្បន្នជាអាជ្ញាកណ្ដាលនៅស្ថានីយទូរទស្សន៍ប៉ុស្តិ៍លេខ ៥បន្ទាប់ពីលាងដៃឈប់ឡើងសង្វៀនប្រកួតក្នុងកំឡុងឆ្នាំ២០១១ ក្រោយពេលលោកដណ្ដើមបានខ្សែក្រវាត់ ISKA ពិភពលោកឆ្នាំ២០០៤៕
អត្ថបទ៖ ស្រី សុវណ្ណដារ៉ាhttp://news.sabay.com.kh/article/800444
