ជនសង្ស័យជាឃាតកសម្លាប់លោក កែម ឡី ឈ្មោះ ជួប សម្លាប់ (ប៉ូលិសថាមិនមែនជាឈ្មោះពិត) ត្រូវបានសមត្ថកិច្ចបង្ហាញក្នុងសន្និសីទកាសែតនាស្នងការដ្ឋាននគរបាលរាជធានីភ្នំពេញ នៅថ្ងៃទី១០ ខែកក្កដា ឆ្នាំ២០១៦។ Brach Chev
Brach Chev
Brach Chev
តំណាងអយ្យការនៃសាលាដំបូងរាជធានីភ្នំពេញ សម្រេចចោទប្រកាន់ជនសង្ស័យសម្លាប់បណ្ឌិត កែម ឡី ពីបទឃាតកម្មគិតទុកជាមុន និងកាន់អាវុធខុសច្បាប់ ដែលនឹងត្រូវជាប់ទោសអស់មួយជីវិត។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បញ្ជាក់នៅថ្ងៃទី១៣ កក្កដា ថា ក្រោយពីសួរចម្លើយ ពិនិត្យឯកសារ និងភស្តុតាងនៅក្នុងសំណុំរឿងឃាតកម្មទៅលើលោក បណ្ឌិត កែម ឡី តំណាងអយ្យការក៏សម្រេចចោទប្រកាន់ជនល្មើស ពីបទឃាតកម្មគិតទុកជាមុន និងបទ កាន់កាប់អាវុធគ្មានការអនុញ្ញាត តាមមាត្រា២០០ និងមាត្រា៤៩០ នៃក្រមព្រហ្មទណ្ឌ។
បន្ថែមពីនេះ តំណាងអយ្យការក៏ចោទប្រកាន់លើបុគ្គលដែលបានលក់អាវុធអោយជនល្មើសពីបទ លក់អាវុធដោយគ្មានការអនុញ្ញាត តាមមាត្រា ២០ នៃច្បាប់ស្ដីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ។
មាត្រា២០០ នៃក្រមព្រហ្មទណ្ឌ ចែងថា ឃាតកម្មគិតទុកជាមុន គឺអំពើសម្លាប់មនុស្ស ដោយគិតទុកជាមុន ឬដោយការពួនស្ទាក់ ហើយនឹងត្រូវផ្ដន្ទាទោសដាក់ពន្ធនាគារអស់មួយជីវិត។
ជនសង្ស័យដែលប្រាប់ទៅប៉ូលិសថាខ្លួនឈ្មោះ ជួប សម្លាប់ នោះ ត្រូវគេស្គាល់អត្តសញ្ញាណយ៉ាងច្បាស់ថាមិនមែនឈ្មោះ ជួប សម្លាប់ ទេ គឺមានឈ្មោះថា អឿត អាង រស់នៅក្នុងភូមិនគរភាស ឃុំនគរភាស ស្រុកអង្គរជុំ ខេត្តសៀមរាប។ ប៉ុន្តែបើតាមលោក លី សុផាណា ជនសង្ស័យរូបនេះ បញ្ជាក់ថា ខ្លួនឈ្មោះ ជួប សំលាប់ ហៅសំលាប់។
លោកបណ្ឌិត កែម ឡី ជាអ្នកស្រាវជ្រាវការអភិវឌ្ឍសង្គម ត្រូវបានខ្មាន់កាំភ្លើងបាញ់សម្លាប់នៅព្រឹកថ្ងៃទី១០ ខែកក្កដា ឆ្នាំ២០១៦ នៅឯស្ដារម៉ាត (Star Mart) ក្នុងស្ថានីយលក់ប្រេងឥន្ធនៈកាល់តិច (Caltex)។ ហើយភ្លាមៗសមត្ថកិច្ចបានឃាត់ខ្លួនជនសង្ស័យមួយរូប នៅម្ដុំវត្តស្វាយពពែ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
http://www.rfa.org/khmer/news/law/court-charge-suspect-on-Kem-Ley-case-07132016005716.html
