លោក Mark Zuckerberg នាយកប្រតិបត្តិ និងជាស្ថាបនិករបស់ក្រុមហ៊ុនបណ្តាញសង្គម Facebook បានក្លាយជាមហាសេដ្ឋីពាន់លានដុល្លារ លំដាប់លេខ ៤ លើពិភពលោក ដោយគិតចាប់ពីថ្ងៃអង្គារម្សិលមិញនេះ នេះបើយោងតាមសន្ទស្សន៍ទ្រព្យសម្បត្តិ របស់បណ្តាមហាសេដ្ឋី នៅលើសកលលោក របស់គេហទំព័រ Bloomberg។
លោក Mark Zuckerberg ទើបតែមានវ័យ ៣១ឆ្នាំរូបនេះ មានទ្រព្យសម្បតិ្តសរុប ៥០ពាន់លានដុល្លារអាមេរិក ដោយគិតត្រឹម ការបិទក្នុងជួញដូរពាណិជ្ជកម្មនៅទីក្រុង New York។ ទ្រព្យសម្បតិ្តដែលកើនដល់ខ្ទង់ ៥០ពាន់លានដុល្លារអាមេរិកនេះ បានធ្វើឲ្យលោក Mark Zuckerberg វ៉ាដាច់លោក Carlos Slim សហគ្រិនសញ្ជាតិម៉ិចស៊ិចកូ ម្ចាស់ក្រុមហ៊ុន America Movil SAB និងលោក Jeff Bezos នាយកប្រតិបត្តិក្រុមហ៊ុន Amazon។
ផ្សារហ៊ុនរបស់ក្រុមហ៊ុន Facebook បានកើនឡើង ៩.៥ភាគរយ នាដើមឆ្នាំ ២០១៦ នេះ។ ទាក់ទងទៅនឹង កំណើនផ្សារហ៊ុនរបស់ក្រុមហ៊ុន Facebook ហក់ឡើងធ្លោរនេះ គឺហួសពីការប៉ាន់ប្រមាណរបស់ក្រុមអ្នកវិភាគ ពោលគឺក្រុមហ៊ុន Facebook បានក្លាយជាក្រុមហ៊ុន ដែលមានតម្លៃជាងគេទី ៤ នៅលើពិភពលោក ដោយឈរបន្ទាប់ពី ក្រុមហ៊ុនមេរបស់ Google គឺក្រុមហ៊ុន Alphabet Inc, ក្រុមហ៊ុន Apple Inc និងក្រុមហ៊ុន Microsoft Corp របស់មហាសេដ្ឋីទី ១ នៅលើពិភពលោកគឺ លោក Bill Gate។
គួរជម្រាបថា ក្រុមហ៊ុន Amazon បានធ្លាក់ចុះក្នុងការជួញដូរអស់ ១៨ភាគរយ ពោលគឺ ខាតអស់ទឹកប្រាក់ ១០.៦ពាន់លានដុល្លារអាមេរិក ដែលធ្វើឲ្យក្រុមហ៊ុនមួយនេះមានទ្រព្យសម្បត្តិនៅសល់ត្រឹមតែ ៤៩.១ពាន់លានដុល្លារអាមេរិកប៉ុណ្ណោះ ខណៈដែលទ្រព្យសម្បតិ្តរបស់លោក Slim បានខាតបង់អស់ ៣.៣ពាន់លានដុល្លារអាមេរិក ដោយសារវិបតិ្តសេដ្ឋកិច្ចនៅប្រទេសប្រេស៊ីល ។
តាមការឲ្យដឹងរបស់ Bloomberg នៅក្នុងបណ្តាមហាសេដ្ឋីដែលមានជាងគេលើលោកចំនួន ៤០០នាក់ លោក Mark Zuckerberg គឺជាមហាសេដ្ឋីម្នាក់ ក្នុងចំណោមមហាសេដ្ឋី ៥នាក់ រួមមានលោក Bill Gates, Jeff Bezos, Larry Page និងលោក Sergey Brin ដែលក្នុងនោះ Mark Zuckerberg ជាបុគ្គលដែលមានទ្រព្យសម្បត្តិកើនឡើងជាងគេ ៕
